“Nia ne’ebé taka nia pekadu sira sei la hetan rahunkmanek: maibé nia ne’ebé konfesa nia pekadu sira no husik tiha sira sei hetan laran-sadi’a.” Proverbio 28:13
Kondisaun hetan Maromak nia laran-sadi’a nian ne’e simples, justu no razoavel. Na’i la ezije ita atu halo buat todan hodi nune’e ita bele hetan pekadu nia perdaun. Ita la presija halo naruk no hakole-an ho peregrinasaun sira, ka atu hala’o peniténsia nakonu-moras sira, atu hahi’i ita-nia klamar sira ba Maromak lalehan nian ka atu hamoos ita nia tranzgresaun; maibé nia ne’ebé mak konfesa tiha no husik tiha ninia pekadu sei hetan laransadi’a.
Apóstolu dehan, “konfesa imi nia pekadu ba malu, no halo orasaun ba malu, nune’e imi bele hetan isin-diak.” Tiago 5:16. Konfesa imi-nia pekadu sira ba Maromak, Nia de’it ne’ebé mak bele perdua sira, no imi-nia kulpa ba malu. Karik imi fó ona ofensa ba imi-nia maluk ka viziñu, imi tenki rekoñese imi-nia pekadu, no nia mak iha dever atu perdua imi ho livre. Tuirmai imi buka perdaun husi Maromak, tanba ema ne’ebé mak imi hakanek ona ne’e propriedade Maromak nian, no iha hakanek nia imi pekadu kontra ninia Kriadór no Maksoin. Kazu ne’e lori de’it ba Mediadór loloos nia oin, ita-nia Saserdote Aas boot, ne’ebé “iha pontu hotu-hotu hetan tentasaun hanesan ita, maibé sein pekadu,” no ne’ebé mak “kona tiha ho sentimentu ita-nia frakeza sira,” no ne’e bele atu hamoos husi noda hotu-hotu injustisa nian. Ebreu 4:15.
Sira ne’ebé mak la haraik sira-nia klamar sira iha Maromak nia oin hodi rekoñese sira nia kulpa, seidauk kumpre kondisaun dahuluk simu nian. Karik ita seidauk esperiénsia katak arrependimentu ida-ne’ebé mak atu arrepende ba, no seidauk haraik an loos klamar nian no harahun espiritu nian konfessa ona ita-nia pekadu sira, hakribi ita-nia injustisa, ita nunka buka loloos ba perdaun pekadu nian; no karik ita nunka buka, ita nunka hetan Maromak nia pás. Razaun mesak de’it tansá ita laiha perdaun ba pekadu sira ne’ebé mak liu tiha ona, ne’e tanba ita la hakarak atu haraik ita-nia fuan sira no konforma ho kondisaun sira husi liafuan lialoos nian. Instrusaun esplísitu ne’e fó tiha ona kona-ba asuntu idane’e. Pekadu nia konfisaun, iha publiku ka privadu, tenki senti iha fuan no espresa ho livre. Ne’e laós atu litik husi pekadór. Ne’e laós atu halo ho maneira lasériu no la kuidadu, ka obriga husi sira ne’ebé la rekoñese sensu husi hakribi pekadu nia karakter. Konfisaun ne’ebé mak nakfui husi fuan-laran liu klamar nian hetan ninia dalan ba Maromak sadi’a infinitu nian. Salmista dehan: Na’i besik ba sira ne’ebé fuan-moras; no salva sira ne’ebé iha espiritu arrepende. Salmo 34:18.
Konfisaun loloos ne’e sempre iha karakter espesifiku ida, no rekoñese pekadu sira particular. Sira bele hanesan natureza ida nu’udar lori ba iha Maromak nia oin de’it; sira bele-mós pekadu ne’ebé tenki konfesa ba ema individual ne’ebé sofre ona kanek liu husi sira; ka sira bele-mós karakter publiku nian ida, no tuirmai tenki konfesa ho publiku. Maibé konfisaun hotu tenki katebes no klaru, Rekoñese pekadu sira loloos husi ida-ne’ebé imi sente pekadu.
Iha Samuel nia loron sira ema Izrael sira hadook-an husi Maromak. Sira sofre pekadu nia konsekuénsia sira; basá sira lakon ona sira-nia fiar iha Maromak, lakon sira nia haree husi Ninia podér no sabedoria atu ukun nasaun, lakon sira nia konfiansa iha Ninia abilidade atu defende no justifika Ninia kauza. Sira fila kotuk husi Ukun-na’in boot universu nian no dezeju atu sai governadu hanesan ho nasaun sira ne’e haleu sira. Molok sira hetan pás sira halo konfisaun katebes: “Ami aumenta tiha ona hahalok-aat ida-ne’e ba ami-nia pekadu sira hotu, hodi husu ba ami liurai ida.” 1 Samuel 12:19. Pekadu loloos husi ida-ne’ebé sira hetan konvense atu tenki konfesa. Sira-nia agradesimentu-laek hanehan sira nia klamar no hakotu sira husi Maromak.
Konfisaun sei la bele simu ba Maromak sein arrependimentu sinseru no reformasaun. Iha ne’ebá tenki deside mudansa sira iha moris; buat hotu ne’ebé ofensivu ba Maromak tenki tau ketak. Ida-ne’e mak sei sai rezultadu terus loloos ba pekadu. Serbisu ne’ebé ita tenki halo iha ita-nia parte tau ho simples didiak iha itania oin: “hamoos imi, halo imi moos; hadook buat-aat husi imi-nia hahalok iha Ha’u-nia matan; para halo buataat; aprende atu halo diak; buka julgamentu, halivre sira ne’ebé hetan hanehan, julga aman-laek sira, defende feto-faluk.” Izaias1:16,17. “Karik ema-laran-aat restaura kompromisu, fó filafali saida mak nia na’ok, la’o iha estatutu moris nian, sein halo injustisa; nia sei moris ho serteza, nia sei la mate.” Ezekiel 33:15. Paulo dehan, iha serbisu arrependimentu nian:“Imi terus ona tuir Maromak nia hakarak, tan ne’e halo kuidadu imi-nia an, haloos iha imi-nia an, laran-nakali, tauk , dezeju ho manas, laran-manas, vingansa! iha buat hotu imi aprova ona imi-nia an atu sai moos iha asuntu ida ne’e.” 2 Korinto 7:11.
Bainhira pekadu hamate tiha vizaun moral,ema ne’ebé halo aat la haree defeitu husi ninia karakter neim rekoñese husi buat-aat boboot ne’ebé nia halo ona; no exetu nia hakruuk ba podér konvense husi Espiritu Santu nia nafatin iha parte delek ba ninia pekadu. Ninia konfisaun sira la sinseru no sériu. Ba rekoñesimentu hotu husi ninia kulpa nia aumenta deskulpa ida ba justifikasaun ninia lala’ok, deklara hela katak karik ne’e laiha sirkumstánsia hanesan ne’e nia sei la halo asaun ida-ne’e ka ida-ne’eba husi ida-ne’ebé nia reprovadu.
Hafoin Adaun no Eva han tiha ona ai-fuan bandu, sira nakonu ho sensu moe no ta’uk. Ba dahuluk sira-nia hanoin mak oinsa atu deskulpa sira-nia pekadu no halaisees husi ta’uk sentensa mate nian. Bainhira Maromak husu kona-ba sira-nia pekadu, Adaun hatan, tau kulpa balun ba Maromak no balun ba ninia kompaña: “Feto ne’ebé Ita-boot fó tiha ona atu hamutuk ho ha’u, nia fó husi ai ine’ebá, no ha’u han tiha.” Feto tau-pekadu ba samea, dehan, “samea bosok ha’u, no ha’u han tiha.” Génesis 3:12,13. Tansá mak Ita-boot halo samea? Tansá mak Ita-boot husik nia mai iha Eden? Sira ne’e mak pergunta sira implika iha ninia deskulpa ba ninia pekadu, tan ne’e akuza Maromak ho responsabilidade husi sira-nia monu. Espiritu justifikasaun-an nian orijina iha aman bosok-teen no hatudu ona liu-husi Adaun nia oan-mane sira no oan-feto sira. Konfisaun husi orden ida-ne’e la inspira husi Espiritu divinu no sei la bele simu ba Maromak. Arrependimentu loloos sei dirije ema atu lori ninia kulpa rasik no rekoñese ne’e sein bosok ka laran makerek. Hanesan kiak publikanu, la hasae liu ninia matan ba lalehan, nia tanis, “ Maromak laran-sadi’a ba ha’u pekadór,” no sira ne’ebé rekoñese sira-nia kulpa sei justifika, basá Jezús sei aprezenta Ninia raan iha importansia husi klamar arrepende.
Ezemplu sira iha Marromak nia liafuan husi arrependimentu loloos no haraik-an revela espritu konfisaun nian iha ida-ne’ebe iha ne’eba laiha deskulpa ba pekadu ka buka justifikasaun-an. Paulo la buka atu hamahan nia-an; nia pinta ninia pekadu iha kór metan liu, la buka atu hamenus ninia kulpa. Nia dehan, “ha’u taka ema santu barak iha prizaun, ha’u simu autoridade husi saserdote ulun; no bainhira atu oho sira, ha’u hasai ha’u nia lian kontra sira. No ha’u fó kastigu ba sira husi sinagoga hotu-hotu, no obriga sira atu plasfemia; no hirus demais ba sira, hau persege sira to’o iha sidade estrañu sira.” Apóstolu 26:10,11. Nia la laran-rua atu atu deklara katak “Kristu Jezús mai iha mundu atu salva pekadór sira; husi sira ne’ebe ha’u mak xefé.” 1 Timoteo 1:15.
Fuan haraik-an no fuan-rahun, hakruuk husi arrependimentu loloos, sei apresia buat ruma husi Maromak nia domin no folin Kalvariu nian; no nu’udar oan ida konfesa ba Aman domin-na’in, hanesan ne’e mak penitente loloos sei lori ninia pekadu sira ba iha
Maromak nia oin. No ne’e hakerek nanis: karik ita konfesa ita-nia pekadu, Nia mak fiar-metin no justu atu perdua ita-nia pekadu no hamoos ita husi injustisa hotuhotu.” 1 João 1:9.