“Durante ita nia tempu difikuldade nia laran, “ama komesa, “Maromak promete ona knananuk ida iha tempu kalan.”
“Nee signifika katak ita sei kontenti maske iha tempu terrivel nia laran ka?”Miguel dehan.
“Diak,” ama dehan, “nee signifika katak Maromak sei fo korajem ba ita. Isaiah 30:29 dehan, “Imi sei iha kanta ida, hanesan bainhira ema halo festa santu iha kalan; no imi sei iha fuan laran nebee kontenti, hanesan bainhira ema lao ba ho flauta hodi sae foho Nai nian, ba Israel nia Fatuk.”
“Maibe oinsa mak ita bele kanta knananuk haksolok nian iha tempu aat nebe ita esperiensia?” Miguel husu. “Maske Maromak hamutuk ho ita?”
“Maromak revela ona ba Sra. White kona ba buat interesante husi mundu ida nee iha tempu ikus,” ama dehan. “Dala ruma sira sei responde o nia pergunta.
“Maromak hatudu ba nia katak antes Jesus mai, nakukun mahar sei taka mundu nee tomak. Ema sei sai tauk no nakdedar iha nakukun laran. No arko-íris sei mosu husi lalehan. Nia sei haleu kada grupu orasaun nian. Maromak nia ema sira sei rona Nia lian no dehan, “hateke ba leten!’ Sira sei haree arko-íris no sira sei haree Jesus. Sira nia tempu libertasaun too ona! Ida nee sei sai tempu ida nebe mak nakonu ho haksolok ba Maromak nia ema sira, no tempu ida nebe mak nakonu ho tauk ba sira seluk nebe tuir Diabu.”
92 “Buat hotu-hotu iha natureza sei nakfilak hotu. Laiha buat ida mak sei sai diak. Fluksu sira sei suli fila ba kotuk. Kalohan nakukun sira sei soke malu. Maromak nia lian sei dehan, “hotu ona.” Ninia lian halo nakdoko mundu nee. Rai-nakdoko nebe boot liu hotu sei mosu iha tempu neba. Kalohan rasik loke no taka. Foho sira sei nakdoko. Fatuk sira sei nakrakat iha nebe deit. Laloran tasi baku makaas hanesan hirus. Furasaun no tufaun makaas. Rai sai bubu no rahun hotu. Foho sira komesa monu. Ilha sira mos komesa lakon, Roo boot sira hotu mout iha tasi laran. Iha tempu nebe hanesan, paredi prizaun sira mos monu hotu, no Maromak nia ema sira nebe mak iha Prizaun laran sai livre.”
“Hau gosta loos! Miguel dehan. “Iha fatin ema sira nebe mak la hatene kona ba Biblia sai tauk loos.”
“Derepenti deit sira komesa komprende saida mak akontese dadauk iha sira nia oin,” ama dehan, “no tarde liu ona ba sira atu husu perdaun tanba durante nee sira funu hasoru Maromak. Rate sira nakloke, no ema balun moris hias. Maromak nia ema sira hotu nebe mak mate ona desde 1844 hetan resureisaun atu haree Nia fila mai iha Nia gloria. No sira nebe mak krusifika sira no Ninia inimigu boot liu iha mundu tomak, sira hotu moris hias hodi haree Jesus mai tuir saida mak uluk Nia hateten ona. Segundu adventu ida nee sei hanesan uluk bainhira sira mate.
“Iha parte seluk, maske Maromak nia ema sira sei hetan resureisaun ho isin nebe hanesan bainhira sira mate, sira sei hetan fresku no iha enerjia hanesan joven, sem kanek ruma ka fitar ruma.”
93 “Entaun Abo Mae Jo sei nafatin badak.” Miguel dehan, “Maibe nian fuuk sei moris fila fali.”
“Diak,” ama dehan, hamnasa. “Jesus sei lori Ninia ema ba lalehan hamutuk no Nia. Sira sei han husi ai-hun moris nian no moris krese hanesan umanu nebe perfeitu.
“Abo Mae Jo sei sai ain-aas!” Miguel dehan.
“O mos sei sai ain-aas hotu,” ama dehan.
“Diak,!” Miguel dehan, “Hau la gosta sai ema nebe mak badak.”
“Husi kalohan nebe mak metan no nakukun, fitun brilhante ida mosu mai,” Ama kontinua, “Mudansa maravilhoza sei mosu ba Maromak nia ema sira nebe mak hein hela Nia atu mai. Iha tempu badak liu ba, sira nia oin kamutis no ansioza. Agora sira sai naroman, maravilha, no domin. Kalohan dala fila fali , no ema hotu inklui ema aat ka ema loos – haree liman ida nebe mak kaer hela tabela fatuk. Tabela nee sai nakloke atu nunee ema hotu bele lee Maromak nia mandamentu. Sira nebe mak ladun tau atensaun ba Maromak nia lei no la halo tuir sai tauk loos.
“Hotu tiha, Maromak nia lian koalia bensaun ba Ninia ema sira nebe mak observa Nia loron sabadu. iha neba akontese hakilar vitoria. Tuir mai, kalohan nakukun kiik ida mosu – ninia medida hanesan deit ho ema nia liman. Maromak nia ema sira hatene katak ida nee mak sinal ba sira katak Jesus mai ona. Sira haree kalohan nee mai besik liu tan no sai naroman, nabilan, no gloriozu liu tan. Kalohan sai nabilan ho anju rihun ba rihun. La kleur tan ema hotu bele haree Jesus iha kalohan, naroman liu fali loron matan iha tempu meudia. Ema aat sira sai tauk tebes, no ema fiel sira mos haree iha sira nia sorin-sorin
94 ema sira nee komesa nakdedar, “See mak brani hamriik iha Nia oin?” Sira husu.
“Sira la brani tanba rai-nakdoko no desastre sira hotu nebe mak akontese iha mundu ga?” Miguel husu.
“Hau hanoin sira nia liafuan nee kona ba, see mak perfeitu hodi bele hamriik iha Maromak poderozu nia oin?” ama dehan. “Tanba Jesus nia lian hatan ba sira no dehan, ‘Hau nia grasa nee sufisiente ba imi.’ Depois anju sira mos komesa kanta, no Maromak nia ema sira nakonu ho haksolok iha sira nia fuan.
“Ema aat sira koko atu subar sira nia oin husi Jesus; sira mos komesa hakilar ba fatuk sira no foho sira atu monu iha sira nia leten no taka sira. Sira nebe mak uluk hamnasa Jesus bainhira Nia tara iha kruz mos sai nonok hotu. Saserdote sira no lideransa sira hanoin parte nebe sira halo iha Jesus nia krusifikasaun, sira tauk los no koko atu subar.
“Depois Jesus Ninia ema fiel sira nebe mak durante nee toba iha tinan barak nia laran. ‘Hader! Hader!’ Nia hakilar. ‘Imi nebe mak toba hela iha rate laran, hamriik ba!’ No sira mos Hader no Hamriik — ema loos sira hotu nebe uluk moris iha mundu nee moris hotu, komesa husi Adaun too tempu prezente. Sira sei la mate tan. Anju sira mos sei lori labarik sira nebe mak mate ona ba sira ida-idak nia inan nia liman.
“Ho tan, ema diak sira nebe mak sei moris iha mundu bainhira Jesus mai, sira nebe nunka mate, sei hetan mudansa iha momentu hanesan piska matan dala ida Maromak sei fo imortalidade; ita sei la mate tan.”
“Wow!” Miguel dehan, “Hau hakarak lalais ona.”
95 “Hau hotu,” ama konkorda. “Kolega no familia sira hotu nebe mak fahe malu ona tanba mate sei hamutuk fali. Ema sira nebe mak mate ona no sira hadomi no fiar ba Maromak antes sira nia mate sei sae uluk ba lalehan. Depois mak ita sira nebe mak sei moris sei tuir sira no sae ba lalehan hamutuk.”
“Entaun ita sei semo deit ba lalehan ga?” Miguel husu. “Ka Ita sei ba lalehan ho Ro kalohan nian ruma?”
“Hau la hatene,” ama dehan. “Sra. White dehan ita sae ba lalehan ho karosa kuda nebe mak kanta ‘santu, santu, santu.’ Nia bolu ida nee ‘karosa kalohan nian’ Hau la serteja ida nee signifika saida, maibe nia dehan katak karosa nee kanta bainhira nia lao ba lalehan no anju sira nebe mak akompanha mos kanta hotu. Konserteja, nem Joao iha Apokalipse ka Sra White iha 1800 bele hatene oinsa mak atu dreskreve Ro kalohan nian. Entaun, karosa bele signifika buat barak. Maibe saida los mak karosa nee hau fiar sei furak los no difisil liu fali saida mak umanu kria ona.”
“Diak,” miguel dehan, “tanba Maromak nee matenek liu fali ema hotu iha mundu nee.”
“Sra. White fo hatene ba ita katak antes tama iha Maromak nia Sidade, ita sei hamriik hamutuk hotu iha kuadradu boot no Jesus iha ita nia klaran.”
“Hau hanoin ita hotu sei bele haree Nia husi nebe deit mak ita sei hamriik ba.” Miguel dehan.
“Los kedas,” ama dehan. “No Jesus sei fo emblema votoria nian ba ita.”
“Saida mak emblema vitoria?” Miguel husu.
96 “Diak,” ama dehan. “Hanesan iha mundu nee bainhira ita fo premiu estatua ka kopu ba ema sira nebe mak atinje ona buat ruma no sai mana-nain ka champion.”
“Oh, hau komprende ona,” Miguel dehan. “Hanesan fita azul sira no buat balun tan. Nee signifika katak ita manan ona.”
“Sim,” ama dehan, “hanesan nee. Hau la hatene emblema vitoria nebe Jesus sei fo nee hanesan saida. Jesus mos sei fo insigna real tanba ita inklui iha majestade, Liurai Univeru nia oan sira. No Nia sei fo koroa. Ita mos sei hetan naran foun.”
“Nee sei furak los ba sira nebe mak nunka gosta sira nia naran,” Miguel dehan.
“Hau hanoin,” ama dehan, “Ita kada ida-idak sei hetan naran espesial nebe mak sei sai hanesan segredu entre Jesus ho ita. Tanba Nia hatene ita diak liu ema hotu, Nia sei fo naran ba ita tuir ita nia personalidade ida-idak no esperiensia sira nebe mak ita iha ho Nia. Ita nia koroa sira sei hakerek “Santidade ba Nai” Jesus mos sei fo ba ita ramu palmeira ida no harpa.”
Miguel komesa hamnasa.
“Saida mak komik liu?” ama husu.
“Diak, tanba hau hatene halimar Trombone, dala ruma hau goja sira nebe mak halimar instrumentu amaradu. Hau sempre dehan instrumentu anin/aar mak diak liu. Maibe afinal bainhira hau ba lalehan, hau sei halimar instrumentu amaradu.
Ama mos hamnasa. “Sim,” nia dehan, “maibe instrumentu sira nee sei furak liu instrumentu sira nebe mak ita haree ona!
97 “Depois, Jesus sei loke portaun no simu ita tama ba Sidade laran. Nia mos sei simu Adaun. Sra. White dehan ba ita katak Nia sei lori Adaun fila ba Jardin Eden. Jesus tau matan didiak ba Jardin nebe Nia kria ona ba Adaun iha tempu uluk. Adaun sei lao ba mai iha Jardin no rekonese aihun sira nebe mak uluk nia kuidadu iha tempu uluk antes buat hotu sai estragadu tanba pekadu. Jesus sei lidera Adaun ba aihun moris nian no han aifuan husi aihun nee. Tempu uluk Adaun tenki husik Jardin nee tanba Maromak lakoi nia atu han aifuan husi aihun moris nee no hetan moris rohan laek ho ninia pekadu. Maibe tanba agora pekadu laiha ona, nia bele han ona no hetan moris rohan laek hamutuk ho Jesus.”
“Wow!” Miguel dehan. “Nee hanesan buat hotu sai perfeitu fali hanesan primeiru antes pekadu mosu.”
“Nee los,’ ama dehan. “Adaun sei kontenti loos. Nia sei tau nia koroa iha Jesus nia ain no hakuak Nia. No ita hotu sei kanta knananuk hahii ba Jesus. No ita umanu husi mundu sei kanta kantiku libertasaun. Biblia hanaran kantiku ida nee “Moses nia Kanta ho bibi Oan.” Anju sira sei para sira nia kanta tanba laiha ema ida mak bele komprende saida mak ita hatene. Laiha ema ida mak hetan ona perdaun no domin boot hanesan ita.”
“Hau senti hanesan la kleur tan hau sei haree sidade nee,” Miguel dehan, “no rona muzika. Hanoin deit, la kleur tan ita sei haree Jesus!”