Diabu, nebe proboka rebeliaun iha lalehan, iha dezeja hakarak halibur mos abitante rai klaran hotu, hodi unidu ho nia iha ninia funu kontra Na’i Maromak. Adão ho Eva iha tiha ona felisidade perfeitu wainhira obedese kompletu Na’i Maromak nia ukun fuan – nebe mak sai nuda’ar testamunia konstante kontra afirmasaun nebe Diabu alega Iha lalehan, katak Na’i Maromak nia lei ne’e hanehan. Diabu determinadu atu kauza Adão ho Eva sira nia monu, atu nune nia bele ukun no estabelese ninia reinu nebe kontrariu ho Na’i Maromak iha mundu ida-ne’e.
Adão ho Eva antes neba hetan tiha ona avizu sobre inimigu perigoju ida-ne’e, maibe inimigu refere serbisu iha nakukun laran ho ninia propozitu nebe naksubar. Nia emprega samea nu’udar ninia mediador, tuir mai kriatura ho aparensia furak ne’e koalia ba Eva: ‘’La’os Na’i Maromak hatete tiha ona, imi keta han husi kada ai-huun iha to’os laran ne’e?’’ Eva habarani an hodi halo negosiasaun ho Diabu no nia monu ba iha Diabu nia arte lohi: ‘’Feto ne’e hatete ba samea ne’e, Ami bele han ai-fuan hotu husi ai-huun sira iha to’os laran ne’e: maibe ai-fuan husi ai-huun iha loos to’os klaran ne’e, Na’i Maromak hatete, Imi keta han, no book de’it mos labele, sei lae imi sei mate. No samea bobar lia ba feto ne’e hodi dehan, Imi sertamente sei la mate: basa Na’i Maromak hatene katak wainhira imi han ai-fuan ne’e, imi nia matan sei nakloke, no imi sei sai hanesan ho maromak, hatene buat di’ak no at.’’ Jenesis 3:1-5.
Eva rende, no liu husi Eva nia influensia Adão mos dirijidu ba iha pekadu laran. Sira aseita liafuan sira husi samea ne’e; sira la konfia ona sira nia Kriador ho hanoin katak Nia aperta sira nia liberdade.
Maibe saida mak Adão hetan husi siknifikasaun husi lia fuan nebe hatete, ‘’wainhira imi han ai-fuan ne’e imi sertamente sei la mate’’? serake Adão dirijidu dunik ba iha ezistensia nebe ezaltada? Adão la hetan ezistensia ekzaltada nebe Diabu hatete nu’udar siknifikasaun husi fraze divinu. Nune Na’i Maromak deklara katak nu’udar ida kastigu ba Adão nia pekadu, ema tenki fila fali ba rai: ‘’O nu’udar rai rahun, o sei fila-fali sai ba rai rahun’’ Jenesis 3:19. Diabu nia lia fuan, “o matan sei nakloke,” so provadu loos iha sentidu ida-ne’e: sira matan nakloke ona hodi haree hetan sira nia beik. Sira hatene duni ona buat at no senti ona ai-fuan moruk husi transgresaun.
Ai-huun moris iha poder sustenta moris rohan laek. Adão sei kontinua aproveita asesu gratuita ba ai-huun ida-ne’e hodi moris ba nafatin, maibe wainhira nia komete pekadu nia separadu husi ai-huun ne’e no sai sujeitu ba mate. Imortalidade lakon tanba transgresaun. Sei laiha ona Esperansa ba rasa umana nebe monu se Na’i Maromak la sakrifika Nia Oan Mane, hodi lori hikas immortalidade ba iha sira nia alkanse. Enkuantu “mate daet ona ba ema hotu, tanba ema hotu komete ona pekadu,’’ Kristu ‘’lori moris no moris rohan laek mai hodi foo naroman atraves Evanjellu.’’ So liu husi Kristu de’it mak ita bele hetan imortalidade. ‘’See mak fiar ba iha Nai Maromak nia Oan Mane, hetan moris rohan laek; no see mak la fiar ba iha Nai Maromak nia Oan Mane sei la haree moris. Roma 5:12; 2 Timotio 1:10; João 3:36.
Bosok Fofoun
Ema nebe promete moris iha desobedesementu nia laran, nia bosok ten. Nune mak deklarasaun samea nian iha to’os Eden – ‘’Imi sertamente sei la mate’’ – nu’udar sermaun primeiru nebe prega kona ba imortalidade klamar. Maibe deklarasaun ida-ne’e, bazeia de’it ba autoridade Diabu nian, nebe lian sai husi pulpitu no fasil atu ema maioria simu hanesan ho uluk ita nia inan-aman primeiru simu lohi Diabu nian iha to’os Eden. Fraze divinu, ‘’Klamar nebe pekadu, sei mate’’ Ezequiel 18:20, ninia siknifikasaun muda tiha ba, klamar nebe pekadu, sei la mate, maibe sei hetan moris rohan laek. Se karik ema, depois nia monu ba pekadu nafatin hetan permisaun hodi asesu livre ba iha ai-huun moris, nune pekadu sei ezisti rohan laek. Maibe laiha familia Adão nian ida mak hetan permisaun atu foti parte iha ai-fuan nebe foo moris rohan laek ne’e. Tanba ne’e laiha pekador ida mak imortal.
Depois monu ba pekadu, Diabu haruka ninia anju sira atu kuda fiar falsu ida-ne’e iha ema nia immortalidade natural. Hafoin hamaus ema hodi simu erru refere, Diabu nia anju sira tenki diriji ema hodi konklui katak ema pekador sei iha sofrimentu eterna laran. Ohin loron prinspe nakukun ne’e duun Na’i Maromak nu’udar tiranu nebe nakonu ho bingansa. Nia deklara katak Na’i Maromak hatama ema hotu nebe la agradar Nia ba iha inferno. Enkuantu ema hotu mankodo didi’ak iha ahi eterna laran, sira nia Kriador hateke sira ho despreza no satisfasaun. Ida ne’e mak demoniu nia ropa ho ninia atributu kmaanek ba ema hotu. Diabu ne’e kruel. Na’i Maromak ne’e domin. Diabu mak inimigu nebe tenta ema halo pekadu no destroi ema. Domin, misrekordia, no justisa sai dois ho dutrina nebe hanorin katak ema at nebe mate hetan kedas kastigu iha ahi inferno laran basa sira komete pekadu durante moris badak iha mundu. Wainhira Na’i Maromak sei iha sira sei nafatin sofre kastigu! Doutor ida nebe estuda maka’as kona ba divindade hatete, “Vizaun ba kastigu inferno sei nafatin tane aas felisidade ema santu sira nian, no halo sira konsiente katak oinsa sira haksolok tebes ho vizaun refere!”
Iha nebe mak ita bele hetan hanorin ida hanesan ne’e Iha Na’i Maromak nia futar lian? Serake sentimentu umanidade komum tenki trokadu tanba de’it krueldade husi ema selvazen? Lae, hanorin ida hanesan ne’e la’os mai husi Livru Na’i Maromak nian. ‘’nu’udar Ha’u nebe moris, dehan Na’i Maromak, Ha’u laiha ksolok ho ema at sira nia mate, maibe ha’u iha ksolok ho ema at sira nia arependementu husi sira nia dalan no moris nebe at: fila fali mai, fila fali mai, husik imi nia dalan at sira; tanba saa imi tenki mate?’’ Ezequiel 33:11.
Serake Na’i Maromak haksolok haree torturasaun nebe nunka para? Serake Nia animadu ho kriatura sira nia tanis-hakilar no halerik sofrementu ahi laran nebe Nia rasik mak mantein? Serake lian halerik bele sai ai-kananuk furak ida ba Domin Infinitu nia tilun? Ouuh ida-ne’e blasfemia nebe terivel tebes! Na’i Maromak nia gloria nunka reforsadu ho perpetuasaun pekadu durante sekulu ba sekulu nebe la’o.
Dutrina falsu Nia Hanorin Kona ba Kastigu Eternu
Dutrina falsu nebe hanorin kona ba kastigu eternal rezulta tiha ona Hahalok at. Reliziaun Biblia, nebe nakonu ho domin no bondade, hetan helik husi istoria falsu no hafalun ho teror. Diabu pinta karakter Na’i Maromak nian ho koor falsu. Diabu Halo ema tauk no odi hasoru Ita nia Kriador nebe nakonu ho laran sadia. Vizaun terivel kona ba Na’i Maromak espaila sai tiha ona ba mundu tomak husi pulpitu nia hanorin halo ema tokon ba tokon sai setismu no infidel. Kastigu eternal mak dutrina falsu no uvas abominasaun (Apokalipse 14:8; 17:2) nebe Babilonia kria hodi halo nasaun hotu-hotu hemu. Ministeiru Kristu nian simu tiha ona dutrina falsu idane’e husi Roma hanesan mos ho uluk sira simu sabadu falsu. * Se ita sees husi Na’i Maromak nia lia fuan no aseita dutrina falsu tanba ita nia aman sira hanorin nanis ona ba ita, siknifika ita monu tiha ona ba iha kondenasaun nebe hato’o ba Babilonia; ita hemu hela uvas husi ninia abominasaun.
Ida ne’e hanesan klase boot ida nebe dirijidu ba iha erru nebe kontrariu. Iha sira nia observasaun, Sira haree katak Eskritura aprezenta Na’i Maromak nu’udar kriatura nebe mak iha domin no kompaixaun. Nune’e sira la fiar katak Na’i Maromak sei submete Ninia kriatura sira ba iha ahi inferno husi nafatin ba nafatin. Sira kaer metin katak klamar naturalmente imortal, tanba ne’e sira konklui katak ema umana hotu sei hetan salva. Ho dalan ida hanesan ne’e, ema pekador sira bele moris iha prazer egoista, ignora Na’i Maromak nia rekezitu, maibe nafatin aseitadu iha Ninia favor. Dutrina hanesan ne’e, so siik de’it Na’i Maromak nia misrekordia no ignora Ninia justisa, no foo ksolok de’it ba iha korasaun carnal.
Serake Ema Hotu Sei Hetan Salvasaun?
Fiar na’in sira nebe fiar katak salvasaun sei akontese ho universalmente, siknifika sira muda tiha ona Eskritura. Maske sira rekoinese an nu’udar servidor Kristu maibe sira nafatin repete falsidade nebe uluk samea hatete iha to’os Eden. ‘’O sertamente sei la mate.’’ ‘’Iha loron o han ai-fuan ne’e, o nia matan sei nakloke, no o sei sai hanesan ho maromak sira.’’ Sira deklara katak ema pekador nebe at liu – mak oho-dor, naok ten, kometedor adulteiru – maibe depois sira mate, sira sei hetan ksolok imortal. Ida ne’e istoria falsu nebe agradavel, no adekuadu tebes hodi foo satisfasaun ba korasaun carnal!
Se istoria ne’e verdade, katak ema hotu bele muda diretamente ba iha lalehan depois oras mate, posibilidade tebes ita sei gosta liu mate duke moris. Ema barak mak lideradu ho fiar ida hanesan ne’e, hodi hakotu sira nia ezistensia. Ho moris nebe nakonu ho problema no desapontamentu, fasil tebes atu hakotu moris hodi haksoit sae ba iha ksolok mundu rohan laek nian.
Na’i Maromak haraik tiha ona iha Nia Lia Fuan, evidensia nebe desisiva katak, Nia sei kastigu transgressor sira nebe transgresa Ninia Ukun Fuan. Serake Nia iha misrekordia nebe boot hodi ezekuta justisa ba ema pekador sira? Haree tok ba iha foho Calvari. Na’i Maromak nia Oan Mane ninia mate, hasasin katak ‘’Kolen husi pekadu mak mate’’ (Roma 6:23), katak kada violasaun hasoru Na’i Maromak nia Ukun Fuan tenki simu ninia kolen. Kristu nebe laiha pekadu nakfilak sai pekadu tanba ema. Nia hulan ema nia sala no ema nia transgresaun sira no hasubar Nia Aman ninia oin, to’o Ninia laran rahuun no Ninia moris sai destruidu. – Sakrifisiu sira ne’e hotu Nia halo atu ema pekador sira bele hetan salva. No kada klamar nebe rejeita foti parte iha redensaun pekadu, nebe oferese ona ho folin karun hanesan sakrifisu hirak ne’e tenki reponsabel rasik ninia pekadu no transgresaun.
Kondisaun Espesifikada Sira
‘’Ha’u sei foo hemu gratuita ba see see de’it mak hamrook ba bee matan moris nian.’’ Promesa ida-ne’e bale de’it ba sira nebe mak hamrok. ‘’See mak manan sei sai erdeiru ba buat hotu; no Ha’u sei sai nu’udar ninia Maromak, no nia sei sai nu’udar Ha’u nia oan.’’ Apokalipse 21:6,7. Kondisaun hotu espesifikadu. Atu sai erdeiru ba buat hotu, ita tenki halakon pekadu. ‘’eransa ida-ne’e ema at sira sei la hetan.’’ Ekleziaste 8:13. Ema pekador sira hanehan rasik sira an. ‘’iha loron kastigu no loron revelasaun julgamnetu lia loos husi Na’i Maromak; nebe sei julga ema ida-idak tuir ninia hahalok,’’ ‘’sofrimentu no terus sei riba ba iha kada ema moris nebe komete hahalok at.’’ Roma 2:5, 6, 9.
‘’Laiha ema pekador seksual ida, ka ema hahalok foer, ka ema kaan teen nebe nudar mos adora na’in ba maromak falsu, mak bele sai erdeiru ba iha reinu Kristu no Na’i Maromak nian.’’ ‘’Ksolok ba sira nebe hala’o ninia dever. Katak, sira bele iha dereitu ba iha ai-huun moris, no bele tama ba sidade Jeruzalem foun laran atraves portaun sira. Basa iha sidade liur iha ema nebe hahalok hanesan asu, no kuku ho matan dook sira, ema pekador seksual sira, oho-dor sira, adora na’in maromak falsu sira no ema see see de’it mak hadomi no halo lia bosok. Efesu 5:5 ARV; Apokalipse 22:14,15.
Na’i Maromak haraik ona ba ema deklarasun ida kona ba Ninia metodu tratamentu hasoru pekadu. ‘Nia sei destroi’Ema at sira hotu.’’ ‘’Transgresor sira sei hetan destroisaun hamutuk; futuru ema at sira nian sei hetan tesi.’’ Salmo 145:20; 37:38. Autoridade governansa divinu sei hamate rebeliaun, maibe justisa retributivu sei konsistente ho karakater Na’i Maromak nian nebe nakonu ho misrekordia no laran kmaus.
Na’i Maromak nunka obriga ema nia hakarak. Nia la haksolok ho obediensia falsu ka la ho laran. Nia hakarak kriatura sira nebe Nia kria ho Ninia liman, hadomi Nia tanba Nia marese hetan hadomi. Na’i Maromak hakarak kriatura sira obedese Nia tanba sira iha apresiasaun nebe intelejensia kona ba Ninia matenek, justisa, no laran maus.
Prinsipiu governansa divinu armonia ho dutrina Kristu nian. “Hadomi imi nia inimigu sira” Mateus 5:44. Na’i Maromak ezekuta justisa ba ema at, hodi foo di’ak ba universiu no ema sira nebe Nia julga. Nia sei halo ema at sira haksolok se Nia bele. Nia haleu sira ho Ninia sinal domin no oferese tuir-tuir sira ho misrekordia; maibe sira despreza Ninia domin, kansela Ninia ukunfuan, no rejeita Ninia misrekordia. Sira kontinua simu bensaun, maibe la foo onra ba Ida Nebe haraik bensaun. Kleur tebes Na’i Maromak tolera ho ema nia hahalok nebe kontra Na’i Maromak; maibe serake Nia tenki kesi rebelde sira ne’e ba iha Nia sorin, hodi ubriga sira halo tuir Ninia hakarak?
La Preparadu Atu Tama Ba Lalehan
Sira nebe hili Diabu nu’udar sira nia lider, la preparadu atu tama ba iha prezensa Na’i Maromak nian. arogansia, desepsaun, imoral, krueldade, firmi iha sira nia karakter.
Serake sira bele tama ba iha lalehan hodi hela hamutuk ba nafatin ho ema sira nebe sira odiu iha mundu? Lia loos sei nunka bele aseita ho lia bosok; laran kmaus sei la satisfas ho estima- an rasik; pureza sei labele aseita ho koruptu; domin nebe la hadomi an la atraitivu ba ema nebe hadomi an rasik. Prazer saida mak lalehan bele oferese ba sira nebe kesi ann ho interese egoista?
Serake ema sira nebe laran ense ho odiu ba Na’i Maromak, lia loos, no santidade, bele halibur hamutuk ho asembleia selestial sira, hodi partisipa iha asembleia selestial sira nia ai-kananuk hahii? Provasaun iha tinan-tinan haraik tiha ona ba sira, maibe sira nunka treinu sira nia hanoin atu hadomi pureza. Sira nunka aprende lian lalehan nian. Agora tarde liu ona.
Moris nu’udar rebeliaun hasoru Na’i Maromak halo sira la marese atu tama ba lalehan. Pureza ho dame Na’i Maromak nian sei sai torturasaun ba sira; Na’i Maromak nia gloria sei nakfilak sai ahi nebe han mutuk. Sira sei saudades atu halai sai husi fatin sagradu neba hodi hasoru destruisaun. Ho nune’e sira bele hasubar an husi Nia nebe uluk mate tanba atu soin sira. Ema at nia destinu termina husi sira nia desizaun nebe sira rasik hili. Sira nia ezkluzaun husi lalehan akontese tanba sira nia voluntariu rasik, justu, no nakonu ho misrekordia iha parte Na’i Maromak nian. Hanesan uluk bee sae, nune’e mos ahi iha loron boot julgamentu sei deklara desizaun Na’i Maromak nian, katak ema at sira labele ona atu hetan kura. Basa sira ezekuta tiha ona sira nia dezeju atraves rebeliaun. Wainhira moris ne’e termina, tarde liu ona atu muda sira nia hanoin husi transgresaun ba iha fidelidade, no husi odi ba iha hadomi.
Destinu Rua
‘’kolen husi pekadu mak mate; prezenti Na’i Maromak nian mak moris rohan laek liu husi Jesus Kristu ita nia Maromak.’’ Moris rohan laek mak eransa ba ema loos sira. enkuantu mate rohan laek sai parte ba ema at. ‘’Mate ba dala rua’’ sei kolokadu ketak husi moris rohan laek. Roma 6:23; haree Apokalipse 20:14.
Konsikuensia husi pekadu Adão nian, rasa hotu-hotu tenki la’o liu husi mate. Ema hotu-hotu tenki tuun ba iha rai kuak laran. Enkuantu liu husi planu salvasaun, ema hotu-hotu sei hadeer sai husi rate laran: ‘’Iha neba sei akontese moris hias, tantu ema loos ka ema sala,’’ ‘’Basa liu husi Adão ema hotu-hotu mate, nune mos liu husi Kristu ema hotu-hotu sei hetan moris.’’ Maibe entre klase rua ne’e sei haketak ho diferensia; ‘’Ema hotu nebe iha rate laran sei rona nia lian, no hadeer sai husi rate; sira nebe hahalok di’ak, sei hadeer ba moris rohan laek: no sira nebe hahalok at, sei hadeer ba kondenasaun’’ Apostlo 24:25; 1 Korintu 15:22; João 5:28,29.
Fim Husi Sofrimentu
Sira nebe “konsideradu marese” moris hias ba moris rohan laek, mak sira nebe “hetan ona bensaun no moris santu.” “mortalidade daruak laiha ona poder ba sira.” Maibe ba sira nebe mak lakohi hetan perdaun liu husi arependementu no fee, tenki simu “kolen husi pekadu.” Katak sira sei simu kastigu “tuir sira nia hahalok,” no remata ho “mortalidade daruak nian.” Iha neba, imposibel tebes ba Na’i Maromak atu salva ema pekador ida, nebe iha hela pekadu laran. Na’i Maromak sei halakon ema pekador ninia ezistensia tanba sira nia transgresaun hadau tiha ona sira husi Nai Maromak. Nune’e Na’i Maromak mos sei halakon sira husi ezistensia nebe mak sira rasik prova katak sira la marese. “Tempu hela ituan de’it ona, ema at sei lakon; O atu konsidera didi’ak ninia fatin, maibe nia laiha ona iha neba” “sira sei sai hanesan nunka iha.” Salmo 37:10; Obadias 16. Sira mout ho sein esperansa, no ema sei haluhan sira rohan laek.
Nune mak Na’i Maromak sei halo iha fim husi pekadu. “Na’i Maromak sei destroi ema at sira, no halakon sira naran. Oh o inimigu, destruisaun sei termina. Disiplu João, iha ninia revelasaun, nia rona inu universal ida nebe lian sein disturbu ruma husi nota diskordia, basa laiha tan ona klamar ida mak bele blasfemia Na’i Maromak. Ema at sira sei tanis lelir iha ahi kondenasaun laran. Kriatura at sira iha enfernu sei labele hatama sira nia halerik hamutuk ho inu nebe hananu husi klamar salvadu sira.
Erru imortalidade natural, hakiak dutrina ida katak, ema mate sei nafatin iha konsensia. Tuir kondenasaun eternu, ida-ne’e kontra Eskritura, kontra razaun, no kontra sentimentu umanidade rasik.
Tuir fiar popular hatete katak, ema pekador sira hetan redensaun iha lalehan, no sira hatene di’ak liu ba buat hotu nebe mak akontese iha mundu ida-ne’e. Maibe oinsa ida-ne’e bele sai fali ksolok boot ida ba ema mate sira hodi hatene kualker difikuldade, hodi tau matan, hodi responsabiliza ema nia halerik, dezapointementu no terus ho susar nebe mak akontese iha mundu ne’e? No pior at liu tan mak oinsa iha fiar ida nebe hatete katak wainhira iis husik hela isin lolon, klamar nebe la konsege arepende sei soe ba iha ahi infernu!
Saida mak Eskritura hatete? Laiha konsiente Iha ema mate: “wainhira iis kotu, ema sei fila hikas ba iha rai; iha loron ne’e kedas nia hanoin sira mos lakon ona.” “Ema nebe moris hatene katak sira sei mate: maibe ema mate la hatene buat ida …. Sira nia domin, sira nia odiu, sira nia laran moras, lakon ona; husi ohin ba oin sira la’os ona parte husi buat saida de’it nebe akontese iha loron matan okos.” Ema nebe iha rate laran labele hahii O, ema mate labele selebra O; sira nebe mate tuun ba rai kuak-laran laiha ona esperansa ba Na’i nia lia loos. Ema moris sei hahii O, hanesan ha’u halo dadauk iha loron ida-ne’e.” “Ema mate laiha ona hanoin kona ba O: iha rate laran see mak sei agradese O?” Salmo 146:4; Ekleziaste 9:5,6; Isaias 38:18,19; Salmo 6:5.
Apostle Pedro, iha loron Pantekosta deklara katak David “mate no hakoi tiha ona, no nia rate sei hamutuk ho ita to’o ohin loron.” “Basa David la hiit an sae ba lalehan.” Apos 2:29, 34. Fatu loloos katak David nafatin iha rate laran, to’o moris hias prova katak ema loos wainhira mate seidauk ba lalehan.
Husi Moris Hias Ba Moris Rohan Laek
Wainhira Jesus kuaze husik Ninia disiplu sira, Jesus la hatete ba sira katak sira sei ba kedas hamutuk ho Nia, “Ha’u ba hodi prepara fatin ida ba imi,” Nia dehan. “Se Ha’u ba no prepara fatin ida ba imi, Ha’u sei fila fali mai, hodi lori imi ba iha Ha’u nia fatin.” João 14:2, 3. Tuir mai apostlu Paulo mos hatete mai ita, katak “Na’i Maromak rasik sei tuun mai husi lalehan ho lian haklalak ida, ho lian Arkanju, hamutuk ho trombeta Na’i Maromak nian: no ema nebe mate iha Kristu sei hadeer primeiru: no ita nebe moris sei hetan hiit sae ba hamutuk ho sira iha kalohan laran, hodi hasoru Na’i Maromak iha anin leten: Nune’e ita sei hamutuk ho Na’i Maromak ba nafatin.” Paulo mos amenta: “foo konfortu malun ba ho lia fuan sira ne’e.” 1 Tesalonia 4:16-18. Iha tempu wainhira Na’i Maromak fila mai, rate matan sei nakfera no “ema nebe mate iha Kristu” sei hadeer ba moris rohan laek.
Ema hotu tenki hetan julga tuir buat nebe hakerek nanis ona iha livru, no sira sei hetan kolen tuir sira nia hahalok. Julgamentu ida-ne’e la’os atu troka mortalidade. “Nia aponta tiha ona loron ida, iha nebe Nia sei julga mundu ho lia loos.” “Haree ba, Na’i Maromak mai ho ema santu sira rihun sanulu, hodi halo julgamentu ba ema hotu.” Apostlu 17:31; Judas 14,15.
Maibe, se ema mate sira agora goja ona iha lalehan ka terus tanis ona iha ahi inferno laran, tanba saa mak sei presija tan julgamentu iha futuru? Na’i Maromak nia lia fuan ema bele komprende ho pensamentu komum. Maibe hanoin sinseru hanesan saa mak bele haree hetan sabedoria ka justisa iha teoria atual? Serake ema loos sei hetan hahii, “Parabens, o mak serventi di’ak nebe foo laran tebes, …. tama mai ba iha o nia Na’i Maromak ninia ksolok,” wainhira sira hela iha Na’i Maromak nia prezensa ba tinan nebe naruuk? Serake ema at sei hetan xamada sai husi ahi infernu laran hodi ba simu sentensa husi juizu? “Sai tiha husi ha’u nia oin, imi nebe hetan babeur, tama ba iha ahi kondenasaun rohan laek”? Mateus 25:21, 41.
Teoria klamar imortalidade nu’udar dutrina ida husi dutrina falsu sira, nebe ema Roma empresta husi paganismu. Martin Luther klasifika dutrina refere hanesan “istoria bosok nebe terivel, hodi hola parte husi dekreta foer Romanu nian.” Enkuantu Biblia rasik hanorin, ema nebe mate sei toba to’o moris hias akontese.
Imortalidade Wainhira Na’i Jesus Fila Fali Mai
Rahun di’ak ba sira nebe deskansa ho lia loos! Tempu naruk no tempu badak ba sira, nu’udar momentu ida; Sira toba; sira sei hader fila fali wainhira trombeta Na’i Maromak nian lian, nune sira sei ba hela iha gloria imortalidade. “Tanba trombeta sei lian, no ema mate sei moris hias ho kondisaun nebe sei la mohu, …. basa isin nebe antes ne’e bele mohu, sei hatais fali isin nebe sei la mohu no isin nebe antes ne’e mate sei hatais fali ho isin nebe sei la mate, ho nune’e mak sei kompleta lia fuan nebe hakerek nanis ona, katak; Vitoria halakon ona mate husi agora ba nafatin.“ 1 Korintu 15:52-54.
Nune’e, wainhira ema mate hetan xamada husi sira nia toba dukur, ba dahuluk liu, sira sei hahuu hanoin kona ba sira nia paralelu iha nebe. No tuir mai sira hanoin kona ba mate nia amiasa nebe uluk sai sensasaun ikus ba sira; sira nia hanoin ikus, katak, sira mout iha poder rate okos nian. Maibe wainhira sira hadeer hias husi rate laran, sira nia hanoin ksolok primeiru sei lian ho haklalak vitoria nian, katak: ”O mate, o nia poder iha nebe? O rate, o nia vitoria iha nebe?” 1 Korintu 15:55.