Wainhira Na’i Maromak nia Lia fuan prega ho laran iha nebe de’it, ninia rezultadu sei prova rasik lia fuan ne’e nia orijin divinu. Ema pekador sira senti sira nia konsiensia hanoin, la’o lais liu. Konviksaun klean domina sira hanoin no sira laran. Sira iha neon ba Na’i Maromak nia lia loos, tanba ne’e sira tanis: “See mak liberta ha’u husi isin mate ida-ne’e?” Roma 7:24. Wainhira krus nakloke, sira haree hetan katak laiha buat ida ekzetu meritu Kristu nian de’it mak bele kasu sira nia transgresaun. Liu husi ran Na’i Jesus nian de’it mak sira bele hetan perdaun ba sira nia pekadu iha pasadu. Roma 3:25.
Klamar sira ne’e fiar, no batizadu, no hamriik hodi la’o iha moris foun, liu husi fee ba Na’i Maromak nia Oan Mane, hodi banati tuir Ninia ain fatin, refleta Ninia karakter, no purifika sira an hanesan ho Nia nebe puru (moos). Buat sira nebe uluk sira odiu agora sira hadomi, i buat sira uluk sira hadomi agora sira odiu. Uluk orguilozu agora nakfilak sai laran kmaus, uluk baidozu no arogante agora nakfilak sai seriu no kuidadu. Uluk lanu agora konsiente, uluk gosta gasta arbiru agora sai puru. Ema Kristaun sira la buka atu “ hafurak an iha parte liur isin lolon, ho uman fuuk, no uza osan mean, ka hatais ropa luxu; maibe ho …. buat nebe mak koruptivel (labele mohu) hanesan, laran maus ho espiritu nebe hakmatek, nebe mak iha Na’i Maromak nia matan folin boot teb-tebes.” 1 Pedro 3:3, 4.
Reavivamentu spiritual sempre hetan marka uluk ho xamada seriu ba ema pekador. Ninia fuan bele haree hetan iha klamar sira nebe la namlaik tanba de’it nega an, basa sira moris haksolok tanba sira konsederadu marese terus tanba Kristu. Ema hotu sei haree transformasaun iha sira an nebe temi Na’i Jesus nia naran. Ida ne’e mak efeitu tuir mai nebe akontese fofoun iha tinan barak nia laran wainhira tempu reliziaun hafoin hahuu harii.
Maibe Reavivamentu spiritual barak iha tempu modernu ida-ne’e aprezenta marka ida nebe oin seluki. Loos duni katak ema barak mak rekoinese an arependementu, hodi iha asesu boot ba iha igreja sira. Maibe sira nia rezultadu la’os atu garante konviksaun katak kresementu akontese hanesan ho moris espiritual real. Naroman nebe lakan iha tempu tempurariu sei mate kedas. Reavivamentu popular dala barak liu estimula emosaun, satisfas domin hodi hadomi ba buat foun nebe nakonu ho supreza sira. ema arepende sira nebe mak igreja hetan sira iha de’it dezeju nebe ituan liu atu rona Na’i Maromak nia lia loos. Ekzetu servisu relizioju nian iha buat ruma nebe mak iha karakter sensasional ruma, basa ba sira lia loos laiha atrasaun.
Liu husi kada klamar sira nebe mak arepende ho loloos, nune relasaun ho Na’i Maromak no buat sira nebe eternu sei sai topiku boot moris nian. Iha igreja popular nebe mak ohin loron iha espiritu konsagrasaun ba Na’i Maromak? ema arependor sira la husik ksolok no domin mundu ida-ne’e nian. See kompara ho antes sira ninia arependementu sira iha hakarak atu nega an hodi tuir Na’i Jesus, maibe iha ohin loron sira lakohi ona atu nega an hodi banati tuir Na’i Jesus nebe mak laran kmaus no hakraik an. Piedade (hahalok kmaanek) kuaze laiha ona husi igreja barak.
Maktuir Verdadeiru Kristu Nian
Maske akontese degradasaun fee nebe luan, maibe maktuir Kristu verdadeiru, ida rua sei hela iha igreja sira leet. Molok Na’i Maromak nia julgamentu ikus to’o mai iha mundu, ema piedade nebe simplis sei moris hias iha Na’i Maromak nia povu sira leet, nebe nunka akontese durante iha tempu apostulu sira nian. Na’i Maromak sei turuk Espiritu Santu mai. Ema barak mak sei haketak an husi igreja sira basa domin ba mundu ne’e troka tiha ona domin ba Na’i Maromak no Ninia lia fuan. Amu lulik barak no ema sira ho laran ksolok sei simu lia loos-lia loos boot sira hodi prepara povu ida ba iha Na’i Jesus nia fila fali mai ba dala rua.
Klamar nia inimigu hakarak impede serbisu ida-ne’e, no antes tempu ba movimentu ida hanesan ne’e to’o, nia sei haka’as an atu impede movimentu ne’e ho introdus movimentu nebe falsu. Iha igreja sira nebe mak nia bele lori ba iha nia poder okos, nia sei hatudu katak bensaun espesial Na’i Maromak nian sei turuk. Wainhira espiritu seluk ne’e halo serbisu ida-ne’e ema barak sei haksolok no haklalak, “Na’i Maromak halo serbisu ho ekstraordinariu.” Atraves forma relijiaun nian, Diabu sei haka’as an atu habelar ninia influensia ba iha mundu Kristaun. Liu husi maneira desenvovimentu espiritual hanesan neba, sei iha emosaun haksolok, misturasaun entre ema loos ho ema sala, nebe ajustadu ho didi’ak hodi lohi.
Maibe iha naroman lia fuan Na’i Maromak nian, fasil atu determina natureza movimentu sira ne’e. Ita bele determina Iha nebe de’it, liu husi haree ema nebe ignora testamunia Biblia nian, fila kotuk ba lia loos nebe klaru no ezamina klamar nebe nega an no rejeitasaun mundu. Husi neba ita foin iha serteja katak bensaun Na’i Maromak nian la turuk. No ho regra, “Husi nia fuan imi sei hatene sira” (Mateus 7:16), klaru katak movimentu sira ne’e la’os serbisu espiritu Na’i Maromak nian.
Lia loos Lia Fuan Na’i Maromak nian mak sasatan uniku hodi kontra poder lohi Diabu nian. Wainhira ignora lia loos ida-ne’e siknifika ita agora loke ona odamatan ba hahalok at nebe mak espaila luan ona iha mundu. Parte boot husi ukun fuan Na’i Maromak nian nebe importante, lakon tiha ona husi ema nia haree. Konsepsaun nebe naksalak kona ba ukun fuan divinu rezulta erru boot iha arependementu no santifikasaun, no hatuun padraun moris Piedade nian. Husi ne’e ita foin haree hetan segredu katak ita ema kuran tebes Espiritu Na’i Maromak nian atu halo resureisaun iha ita nia tempu.
Ukun Fuan Liberdade
Professor relijiaun barak konfirma katak ho Kristu ninia mate Nia hamoos ona ukun fuan. Professor balun deskrebe ukun fuan hanesan ho naha ida nebe mak hasusar, maske ukun fuan Na’i Maromak nian ne’e diferente tebes ho ‘’eskravidaun (serbisu nu’udar atan).“ Sira aprezenta sira nia konfirmasaun ida-ne’e hodi hafalun ema hotu atu ema bele goza nafatin ‘’Liberdade’’ iha Evanjellu okos.
Sira la hanesan ho profeta no apostulu sira nebe mak konsidera lei santu Na’i Maromak nian. David dehan: ‘’Ha’u sei la’o ho livre: tanba ha’u buka Na’i nia orden sira.’’ Salmo 119:45. Apostulu Tiago 1:25. Revelador hatete rahun di’ak ba sira ‘’nebe mak hala’o Na’i nia ukun fuan sira katak sira bele iha direitu ba ai-huun moris nian, no bele tama liu husi odamatan portaun ba sidade laran.’’ Apokalipse 22:14.
Se karik ukun fuan bele muda ka tau sees tiha, Kristu la presija mate hodi salva ema husi pena mate nian. Na’i Maromak Oan mai atu ‘’haboot ukun fuan, no halo ukun fuan ne’e iha onra.’’ Isaias 42:21. Nia dehan: ‘’Keta hanoin katak Ha’u mai atu harahun ukun fuan,’’ ‘’to’o lalehan ho rai klaran liu tiha ona mos, letra ki’ik oan ida ka pontu ida mos sei la lakon husi ukun fuan.’’ Kona ba Ninia an Nia hatete: ‘’Ha’u haksolok halo O nia hakarak, sim ha’u nia Maromak; sim, O nia ukun fuan iha ha’u nia laran.’’ Mateus 5:17,18; Salmo 40:8.
Ukun fuan Na’i Maromak nian labele muda, basa ida-ne’e mak nu’udar revelasaun ida husi karakter autor nian. Na’i Maromak ne’e domin, no Ninia ukun fuan ne’e mos domin. “Domin mak komprimentu ukun fuan.“ Salmo hatete: O nia ukun fuan mak lia loos”; O nia mandamentu hotu mak lia loos.” Paulo hato’o: “Ukun fuan ne’e santu, no mandamentu ne’e santu, no justu, no di’ak.” Roma 13:10; Salmo 119:142, 172; Roma 7:12. Ukun fuan hanesan ne’e tenki dura kleur hanesan ninia Kriador.
Ida ne’e mak serbisu konversaun (arependementu) no santifikasaun nian hodi hadame ema ho Na’i Maromak liu husi lidera sira tuir hanesan ho prinsipiu-prinsipiu ukun fuan Ninian. Iha fofoun kedas, ema iha tiha ona armonia nebe perfeitu ho ukun fuan Na’i Maromak nian. Maibe pekadu hafuik tiha ema husi sira nia Kriador. Ema nia laran funu hasoru Na’i Maromak nia ukun fuan. “Hanoin isin nian mak halo inimigu hasoru Na’i Maromak; tanba ne’e la hakru’uk ba ukun fuan Na’i Maromak nian. Basa ”hakarak isin nian (karnal) mak inimizade (halo ema sai inimigu ho Na’i Maromak); tanba nia sei la hakru’uk (sujeitu) ba Na’i Maromak ninia ukun fuan sira, nia sei la hakru’uk duni.’’ Roma 8:7. Maibe ”basa Na’i Maromak hadomi tebes mundu ne’e, nune Nia haraik Nia Oan Mane mesak,’’ atu nune ema bele hadame fila fali ho Na’i Maromak, no restora ba iha armonia ho ninia Kriador. Mudansa ida-ne’e mak sai nu’udar moris foun ba ema, basa sein mudansa ida-ne’e “ema labele haree reinu Na’i Maromak nian.” João 3:16, 3.
Konviksaun Husi Pekadu
Pasu primeiru iha rekonsiliasaun ho Na’i Maromak mak konviksaun husi pekadu. “pekadu mak transgresaun hasoru ukun fuan.” “liu husi ukun fuan mak mosu kuinesementu kona ba pekadu.” 1 João 3:4; Roma 3:20. Atu hatene ema nia sala, ema pekador tenki ejamina ninia karakter iha lalenok Na’i Maromak nian nebe mak hatudu kona ba karakter perfetu nebe mak loos no foo posibilidade ba ema hodi halo difernsia ba ninia hahalok no hanoin nebe kuran. Ukun fuan hato’o ba ema kona ba ninia pekadu, maibe la oferese pekadu nia aimoruk. Ida ne’e hatete katak mate sai parte husi kontrador ukun fuan. Evanjellu Kristu nian de’it mak bele liberta ema pekador husi kastigu no husi foer pekadu nian. Nune nia tenki halo arependementu ema bele hetan “perdaun ba pekadu nebe liu ona.” (Roma 3 25) no sai Na’i Maromak oan.
Luther Ilustra Oinsa Atu Hetan Perdaun No Salvasaun
Dezeju atu hetan dame ho Na’i Maromak halo Martin Luther didika nia an ba iha moris monastika. Iha ne’e nia hetan obrigasaun tenki halo serbisu ida nebe habaruk tebes nia hodi obriga nia halo izmola husi uma ba uma. Nia ho pasensi toma desprezasaun ida-ne’e, basa nia iha serteza metin katak nia tenki halo serbisu todan atu ninia pekadu sira hotu bele hetan kasu.
Nia hala’o moris ida nebe todan, nia haka’as an ho hadera an, vizilansia, no kastigu an hodi hamate ninia karakter ka natureza at. Nia konfesa ba nia-an, “se ema monje (amu lulik nebe estuda teolojia saserdote nian) ida bele alkansa lalehan liu husi ninia serbisu nu’udar monje, ha’u serteza ha’u sei iha direitu tama ba lalehan …. Se serbisu ne’e la’o kleur liu tan, ha’u pasensi tenki lori ha’u nia mortifikasaun to’o mate.” Ho ninia esforsu tomak, no klamar nebe lori naha, nia nafatin la hetan kmaan. Nune’e ikus mai nia monu ba iha odamatan dezapontementu.
Wainhira nia haree katak nia atu lakon buat hotu, Na’i Maromak fanu nia belun ida hodi haruka ba iha nia. Staupitz loke Na’i Maromak nia Futar Lian ba iha Luther nia hanoin no husu Luther atu fila kotuk ba nia an rasik no haree ba Na’i Jesus. ‘’Duke kastigu an rasik tanba o nia pekadu sira, di’ak liu soe o nia an ba iha Maksoin nia hakuak. Fiar ba Nia, fiar ba lia loos husi Ninia moris, no Ninia mate nebe nu’udar redensaun .… Na’i Maromak Oan .… sai ema ba hodi simu garantia misericordia divina nebe mak sei foo ba ita…. Hadomi ba Nia nebe mak hadomi uluk ona o.’’ lia fuan sira ne’e hafitar tebes Luther nia kakutak. Dame mosu iha ninia klamar nebe problema hela.
Ikus mai Luther nia lian konsege rona liu husi pulpitu iha xamada atensaun solene. Nia hatudu ba ema karakter pekadu nebe ataka no hanorin katak imposibel ema ho nia hahalok rasik bele hamenus ninia sala, ka bele sees husi ninia kastigu. Laiha tan dalan seluk ezektu arependementu ba Na’i Maromak no fee iha Kristu nebe mak bele salva ema pekadu sira. Grasa Kristu nian ema sosa labele; basa ida-ne’e prezente gratuita. Nia foo konseilu ba ema atu sira labele sosa tan karta perdaun nian, maibe tenki haree de’it hoo fee ba iha Kasudor nebe mak ema hedi tiha ona iha krus. Nia konta sai rasik ninia esperensia nebe mak hamoras tebes nia no konvense ninia rona na’in sira, katak ho fiar de’it ba iha Kristu nia konsege hetan ona dame no ksolok.
Serake Perdaun Liberta Ita Husi Obediensia?
Serake ema pekador nebe hetan ona perdaun, agora nia bele livre kontra Na’i Maromak nia ukun fuan? Paulo hatete: ‘’se nune serake ami kansela ukun fuan tanba fee? Lae, Na’i Maromak bandu: nune, ami nafatin estabelese ukun fuan.’’ ‘’Oinsa ita nebe mate ba pekadu, moris kleur liu tan fali iha pekadu laran?’’ Apostolu João hatete: Ida ne’e mak domin Na’i Maromak nian, katak ita obedese Ninia ukun fuan sira: no Ninia ukun fuan sira ne’e la todan.’’ Iha moris foun, ema nia laran sei sai armonia ho Na’i Maromak, no Ninia ukun fuan. Wainhira mudansa ne’e akontese iha ema pekador nia laran, siknifika nia muda ona husi mate ba iha moris, husi transgresaun no rebeliaun ba iha obediensia no lealdade Moris tuan termina ona, moris foun rekonsiliasaun, fee, no domin komesa hahuu ona. No “Lia loos ukun fuan nian’’ sei “kumpri” iha ita an, nebe la moris tuir isin nia hakarak, maibe tuir espiritu.’’Linguajen klamar nian sei akontese: ‘’ Oh oinsa ha’u hadomi tebes Na’i nia ukun fuan! Ida ne’e mak ha’u nia meditasaun iha loron tomak. ‘’ Roma 3:31; 6:2; 1 joão 5:3; Roma 5:3; Roma 8:4; Salmo 119:97.
Seim ukun fuan, ema laiha konviksaun verdadeiru ba pekadu no la senti nesesidade husi arependementu. Sira la hatene sira nia nesesidade ba iha Kristu nia ran nebe kasu sira. Esperansa salvasaun aseitadu sein iha mudansa radikal iha laran no reformasaun iha moris. Arependementu la klean hanesan ne’e sei sai resin, no ema barak tebes mak halibur ho igreja nebe mak nunka unidu ho Kristu.
Saida Mak Santifikasaun?
Teoria santifikasaun nebe erru, mosu mos husi ignorasaun ka rejeitasaun ba ukun fuan divinu. Teoria sira ne’e, falsu iha dutrina no perigu tebes iha ninia rezultadu pratika , maibe jeralmente hetan favor.
Apostulo Paulo hato’o, ‘’Ida ne’e mak Na’i Maromak nia hakarak, imi nia santifikasaun.’’ Biblia ho klaru hanorin saida mak purifikasaun no oinsa purifikasaun ne’e tenki hetan alkansa husi ema. Na’i Salvador harohan ba Ninia eskolante sira: ‘’Hasantu sira ba liu husi O nia lia loos: O nia futar lia mak lia loos.’’ No apostolu Paulo hanorin katak ema fiar na’in sira tenki ‘’hasantu husi Espiritu Santu.’’ 1 Tesalonia 4:3; joão 17:17; Roma 15:16.
Knaar Espiritu Santu mak saida? Jesus foo hatene ninia eskolante sira: ‘’Wainhira Nia, Espiritu Lia Loos, mai, Nia sei diriji imi ba iha lia loos hotu.’’ João 16:13. No salmista hatete: ‘’Na’i nia ukun fuan mak lia loos.’’ Tanba ukun fuan Na’i Maromak nian ne’e ‘’sagradu no justu no di’ak,’’ nune’e karakter nebe forma ona husi obidensia ba ukun fuan, ne’e sei sai santu. Na’i Jesus mak ezemplu perfeitu husi karakter hanesan ne’e. Nia dehand: ‘’Ha’u halo tuir tiha ona Ha’u nia Aman ninia mandamentu.’’ ‘’Ha’u sempre halo buat nebe mak haksolok Nia.’’ João 15:10; 8:29. Maktuir Kristu nian tenki sai hanesan ho Kristu liu husi grasa Na’i Maromak nian hodi forma karakter nebe hanesan ho prinsipiu-prinsipiu ukun fuan sagradu sira. Ida ne’e mak purifikasaun loloos nebe hanorin iha Biblia.
So Liu Husi Fee De’it
Serbisu ida-ne’e so bele finaliza liu husi fee iha Kristu, ho poder nebe horik iha Espiritu Na’i Maromak nian. Ema Kristaun sira sei senti sujestoen ba Pekadu, mesmu nune’e sira sei nafatin mantein hodi halo funu hasoru pekadu. Iha ne’e mak presija tebes Kristu nia tulun. Frakeza ema nian unidu ho poder divinu, no fee esklama: ‘’agradese ba Na’i Maromak nebe haraik vitoria mai ita liu husi ita nia Na’i Jesus Kristu.’’
Serbisu santifikasaun ne’e progresivu. Moris nu’udar Kristaun sei hahuu iha wainhira ema pekador hetan dame ho Na’i Maromak iha arependementu laran. Agora nia tenki ‘’la’o ba iha perfeisaun,’’ hodi krese ‘’tuir medida kresementu perfeisaun Kristu nian.’’ ’’Ha’u ezije ba iha tarjetu ba prezenti husi xamada boot Na’i Maromak nian iha Kristu Jesus. Ebreu 6:1; Efesu 4:13, Filipe 3:14.
Sira nebe iha esperensia purifikasaun Biblia nian sei hatudu laran nebe hakraik an. Sira haree sira nia indignidade rasik iha diferensia ho perfeisaun nebe Infinitu. Profeta Daniel mak ezemplu santifikasaun nebe verdadeiru. Wainhira nia hasa’e harohan iha Na’i Maromak nia oin tanba Na’i nia povu ninia moris Nia la identifika an nu’udar ema nebe puru no sagradu, maibe nia identifika an nu’udar ema Israel ida nebe pekadu teb-tebes,. Daniel 10:11; 9:15, 18.
Sira nebe la’o iha lalatak krus Kalvari nian nunka iha eksaltasaun propria (hahii-an rasik), pretensaun (reklama) arogante iha sira nia iberdade husi pekadu. Sira senti katak pekadu sira nian mak kauza terus nebe harahun Na’i Maromak Oan nia laran, no hanoin ida-ne’e sei diriji sira ba iha atitude hakraik an. Sira nebe moris besik liu ho Na’i Jesus haree klaru liu frakeza no pekadu ema nian, no esperansa uniku sira nian mak meritu Na’i Maksoin nian nebe hetan hedi iha krus no moris hias.
Santifikasaun ida ohin loron ne’e sai popular iha mundu relijiozu nebe koko praktika espiritu hahii rasik an, hodi despreza Na’i Maromak nia ukun fuan nebe marka hahalok at refere nu’udar buat ida nebe fuik ka estreinu iha Biblia. Sira nia defensor sira hanorin katak santifikasaun ne’e sai nu’udar obra instante (lais) ida, nebe ema bele hetan liu husi ‘’de’it fee,’’ sira bele atinji santifikasaun nebe perfeitu. Sira dehan, ‘’Fiar de’it,’’ ‘’no bensaun sei sai o nian.’’ La presija tan esforsu adisional ruma husi simu na’in. Iha tempu hanesan sira nega autoridade ukun fuan Na’i Maromak nian, no ezije atu sira hetan livre husi obrigasaun atu guarda mandamentu. Maibe serake ita bele sai santu sein armonia ho prinsipiu sira nebe foo sai natureza no hakarak Na’i Maromak nian?
Testamunia Na’i Maromak nia Futar Lia kontrari absolutamente ho dutrina “fee sein hahalok” nebe lasu. Dutrina ida-ne’e so sai nu’udar de’it presunsaun (hanoin) ida. Basa Fee nunka ezije favor Lalehan nian, sein kumpri kondisoens nebe mak haraik misrekorsia mai. Haree iha Tiago 2:14-24.
Keta husik ema ida keta lohi nia an ho presunsaun katak sira bele sai santu, enkuantu ho finji viola hela rekezitu Na’i Maromak nian. Pekadu nebe halo ho finji ka ho hatene an, hamate Lian testamunia Espiritu nian no haketak klamar husi Na’i Maromak. Maske eskolante João hanoin atu hakerek kompletu kona ba domin ba Na’i Maromak, maibe nia la duvida atu hato’o sai karakter verdadeiru no klase nebe mak konfesa katak sira santifikadu enkuantu moris hela iha transgresaun ukun fuan Na’i Maromak nian. ‘’Nia nebe dehan, ha’u koinese Nia, no la halo tuir Ninia mandamentu, nia ne’e bosok ten, no lia loos laiha iha nia an. Maibe see mak halo tuir Nia lia fuan, loloos ne’e iha nia an mak iha domin Na’i Maromak nian nebe perfeitu.’’ 1 João 2:4, 5. Ida ne’e mak ezame husi profesaun kada ema nian, se ema tau sees no ignora mandamentu Na’i Maromak nian, se sira ‘’kontra ida husi mandamentu sira ne’e, tantu ki’ik oan ida hodi hanorin tuir sira nia transgresaun,‘’ Mateus 5:18, 19, ita parese hatene katak sira nia reklamasaun laiha fundasaun.
Reklamasaun sein pekadu mak evidensia katak nia nebe nu’udar reklamante ne’e dook tebes husi moris santu. Nia laiha konsepsaun nebe loos kona ba pureza no santidade Na’i Maromak nian nebe infinitu, no hahalok siak no hahalok at pekadu nian. Wainhira distansia husi nia an ho Kristu hetok dook ba bebeik, nia haree nia an hetok loos iha ninia matan rasik.
Santifikasaun Bibliku
Santifikasaun hakuak tomak kriatura – espiritu, klamar, no isin lolon hotu. Haree iha 1 Teselonia 5:23. Ema Kristaun sira hetan konvida atu oferese sira nia isin lolon nu’udar “oferta ida nebe moris, sagradu, no bale ba Na’i Maromak.’’ Roma 12:1. Kada pratika nebe hafraku forsa fiziku ka mental la marese ba ema atu servi ninia Kriador. Sira nebe hadomi Na’i Maromak ho sira nia fuan laran tomak, sei kontinua haka’as an ba nafatin hodi harmoniza kada forsa nebe sira iha ho ukun fuan sira nebe mak dudu sira nia kbiit hodi praktika Na’i Maromak nia hakarak. Sira sei la hamania bontade ka induljensia hodi hafraku ka hafoer oferta nebe mak sira oferese ba sira nia Aman selestial.
Kada satisfasaun pekadu iha tendensia atu halo aleza no hamate persepsaun mental no espiritual; Lia fuan ka Espiritu Na’i Maromak nian so bele husik de’it impresaun nebe fraku iha fuan-laran. “Mai ita hamoos ita an husi kualker foer oin-oin iha isin lolon no espiritu, halo perfeitu santidade ho hamtauk ba Na’i Maromak.” 2 Korintu 7:1.
Ema barak nebe rekoinese an nu’udar ema Kristaun sira hatuun sira nia divinu nebe hanesan ho idolu nebe kaan-ten ho hemu uvas no moris iha ksolok proibidu. No igreja dala barak liu sempre suporta hahalok at sira ne’e, hodi ense fila fali igreja nia tezouru enkuantu igreja ne’e rasik ninia domin ba iha Kristu fraku tebes atu halo fornesementu. Serake ohin loron Na’i Jesus nafatin tama iha igreja sira ne’e hodi haree festa nebe mak lori reliziaun nia naran iha neba, la’os Nia sei duni ema sira nebe hafoer igreja, hanesan uluk Nia duni ema trokador osan sira iha temple?
“Imi la hatene ga, katak imi nia isin lolon mak temple Espiritu Santu, nebe imi iha husi Na’i Maromak, no imi la’os na’in ba imi nia an rasik? Basa Na’i Maromak sosa kotu tiha ona imi: tanba ne’e glorifika ba Na’i Maromak iha imi nia isin lolon no iha imi nia espiritu, nebe mak Na’i Maromak nian.’’ 1 Korintu 6:19, 20. Nia nebe ninia isin lolon mak templu espiritu santu nian sei la hetan dadur husi habitu nebe estraga. Basa Kristu mak sai na’in ba Na’i Maromak nia poder, no Na’i Maromak rasik mak sai na’in ba ita nia propriedade. Oinsa mak nia bele husik let liu de’it kapital nebe mak konfiadu ona ba nia ne’e?
Ema sira nebe rekoinese an nu’udar ema Kristaun kada tinan gasta osan lubun boot ida hodi hamania an nebe estraga. Na’i Maromak nia dezimu no oferta hetan naok, enkuantu sira konsumu dezimu no oferta sira ho induljensia nebe destroi iha altar leten, ho kuantidade boot liu fali ho gastus sira nebe sira foo hodi hakmaan ema kiak no suporta evanjelizasaun. Se ema kristaun hotu-hotu nebe konfesa katak Kristu hetan duni satifikasaun, sira sei muda sira nia hanoin hodi uza sira nia riku soin hodi sai tezouru Na’i Maromak nian, duke sira gasta hotu hodi hamania an nebe la presija no bele hamoras. Ema Kristaun sei foo ezemplu simples sakrifika an. Nune’e sira sei sai naroman ba mundu.
‘’Isin ho matan nia hakarak, no arogansia moris’’ (1 João 2:16) domina ema barak. Maibe maktuir Kristu iha xamada nebe mak sagrada liu. ‘’Sai tiha husi sira leet, no haketak imi an ba, Na’i Maromak nia futar lian dehan, no keta book buat nebe foer.’’ Ba sira nebe kumpri rekezitu, refere Na’i Maromak promote, “Ha’u sei simu imi, no sei sai Aman ba imi, no imi sei sai Ha’u nia oan mane no oan feto, dehan Na’i Maromak nia futar lian nebe poderozu.’’ 2 Korintu 6:17, 18.
Asesu Direta Ba Na’i Maromak
Kada pasu fee no obidensia lori klamar ba iha relasaun ida nebe besik liu ho Naroman Mundu nian. Naroman husi loron matan lia loos nia nabilan leno Na’i Maromak nia atan, nune’e sira tenki leno tutan Ninia nabilan. Fitun sira foo hatene ita iha naroman iha lalehan ho gloria nebe halo sira sai naroman; nune’e mak ema Kristaun manifesta katak iha Na’i Maromak iha tronu leten aas ba nebe mak Ninia karakter marese hetan hahii no hasara. Santidade karakter Ninian sei manifesta iha Ninia sasin sira.
Liu husi Kristu nia meritu ita bele iha asesu ba iha tronu poder infinitu. ‘’Nia nebe la hanoin Ninia Oan Mane rasik, no entrega Nia Oan Mane ba ita hotu, oinsa mak Nia ho ka la ho Nia Oan Mane la haraik buat hotu mai ita ho libre?’’ Jesus dehan: ‘’se imi nebe at, hatene oinsa foo prezente di’ak ba imi nia oan sira: sa tan ho imi nia Aman iha lalehan, Nia sei haraik Espiritu Santu ba sira nebe husu ba Nia?’’ ‘’Se imi husu buat ruma iha Ha’u nia naran, Ha’u sei, Ha’u sei halo bai mi.’’ ‘’Husu ba, no imi sei simu, atu nune’e imi nia ksolok bele nakonu.’’ Roma 8:32; Lucas 11:13; João 14:14; 16:24.
Ida ne’e privilejiu ema ida-idak nian hodi moris ho nune’e Na’i Maromak sei hatan no haraik bensa ita ema. Aman selestial lakohi atu ita iha hela de’it kastigu no nakukun nia okos. Laiha evidensia hakraik an nebe verdadeiru nebe mak hela hamutuk ho ulun nebe hakru’uk no laran nebe nakonu ho hanoin rasik an sira. Ita bele baa iha Na’i Jesus hodi hetan hamoos no hamriik iha kastigu nia oin sem sentimentu moe no basa reen to’os.
Liu husi Na’i Jesus, Adão nia oan sira nebe monu ba pekadu bele nakfilak sai ‘’Na’i Maromak nia oan.’’ ‘’Na’i Jesus la moe atu temi sira nu’udar maun-alin’’ Ema Kristaun nia moris tenki nakonu ho fee, vitoria, no ksolok iha Na’i Maromak. ‘’Ksolok boot husi Na’i Maromak mak imi nia poder.’’ ‘’haksolok ba nafatin, harohan ba sein para. Agradese ba ho buat hotu: tanba idane’e mak Na’i Maromak ninia hakarak iha Kristu Jesus ba imi.’’ Ebreu 2:11; Ne’emias 8:10; 1 Tesalonia 5:16-18.
Ida ne’e mak ai-fuan konversaun (arependementu) no santikasaun Biblia nian; nebe akontese tanba prinsipiu-prinsipiu boot justisa nian, nebe estabelesidu ona iha ukun fuan nebe konsideradu indiferentemente. Ukun fuan nebe konsederadu indiferentemente sei halo ema la haree hetan ai-fuan konversaun no santifikasaun. Ida ne’e mak razaun tanba saa iha de’it manifestasaun ituan husi obra Espiritu nian nebe klean no rohan laek, nebe antes marka tiha ona avivamentu espiritual.
Liu husi konversaun no santifikasaun nebe loloos tuir Biblia, ema sei haree, katak ita transformadu ona. Basa hanorin sagradu sobre Na’i Maromak nia karakter perfeisaun no santidade nebe Na’i Maromak revela ona, ignoradu husi ema. Ema nia hanoin interese liu ba
(43) dutrina no teoria sira nian, hodi haktuir kedas ho degradasaun Piedade (hahalok kmaanek no loos) iha igreja laran. maibe wainhira ukun fuan Na’i Maromak nian restoradu ba iha ninia pozisaun loos, maka sei akontese avivamentu fee no piedade primitivu iha entre sira nebe konfesa an nu’udar Na’i Maromak nia povu.