Wainhira lei protesaun umana retiradu husi ema sira nebe obedese ukun fuan Na’i Maromak nian, iha rai hotu sei ezekuta movimentu simultaneamente (hala’o hamutuk dala ida de’it) ida hodi foo destruisaun ba sira. Wainhira tempu nebe kombinadu iha dekretu ne’e hetok besik ona, ema hotu sei konspira (futu lia) hamutuk hodi halo atakasaun[ iha kalan ida nu’udar pankada nebe determina hodi hamate diferensia idea no reprensaun (avizu).
Povu Na’i Maromak nian – balun sei hetan kastigu iha sela kadeia, balun iha ai-laran no balun iha foho – tuku tuur harohan ba protesaun husi divinu. Ema sira armadu, hetan suporta husi anju at sira, prepara namanas knaar mortalidade nian. Agora, iha momentu nebe ekstremu, Na’i Maromak sei interompe: ‘’Imi sei hananu ai-kananuk ida, hanesan iha tempu kalan wainhira ema hasantu sira an ba selebrasaun; no imi laran sei haksolok, hanesan ho wainhira ema ida la’o …. atu sae foho Na’i Maromak nian, baa iha foho fatuk Israel. No Na’i Maromak sei halo ita rona Ninia lian nebe iha gloria, Nia sei hatudu Ninia liman nebe tuun hodi hanehan ho siak nebe maka’as no ahi lakan nebe han mohu, ho udan boot, anin fuik no udan jeilu.’’ Isaias 30:29, 30.
Ema at barak sei ataka ninia albu, wainhira nakukun falun metin kalan iha rai leten. Tuir mai, arkuiris tiru iha kalohan leten i haree hanesan nabilan ida nebe haleu hela grupu ida nebe halo hela orasaun. Ema barak nebe hirus hetan kaptura. Objetu hirus sira nian, sira haluhan tiha ona. Sira hateke ba simbolu aliansa Na’i Maromak nian no hakarak loos atu hetan proteje husi naroman ne’e.
Povu Na’i Maromak nian sei rona lian ida, haruka, ‘’Hateke ba iha leten.’’ Wainhira sira hateke ba iha leten, sira haree Hanesan ho Estevão, (Kristaun nebe sai martir primeiru) uluk haree. No nune sira foti matan ba leten sira haree hetan Na’i Maromak nia gloria no Oan mane tuur hela iha Ninia tronu leten. Haree Apostolu 7:55, 56. Sira haree Ninia sinal humiliasaun sira, no rona pedidiu ida dehan, ‘’Ha’u hakarak sira nebe mak O foo ona mai Ha’u, hamutuk ho Ha’u iha Ha’u nia fatin agora.’’ João 17:24. Sira rona iha lian ida hatete, ‘’Sira mai ona, sira santu, la perigu, la foer! Sira kuidadu tiha ona Ha’u nia futar lian nebe pasensi.’’
Libertasaun Mai!
Iha kalan boot Na’i Maromak manifesta Ninia poder hodi foo libertasaun ba Ninia povu. Loron matan hamosu nia naroman ho ninia poder. Haktuir ho Sinal no milagre sira. Ema at haree ho tauk iha fatin akontesementu, enkuantu ema loos haree akontesementu ne’e nu’udar sira nia sinal libertasaun. Iha lalehan siak nia klaran, iha espasu ida nebe moos ho gloria ida nebe indiskritibel (labele atu deskrebe sai), husi neba mak Na’i Maromak nia lian sai mai, hanesan ho bee barak nia lian, i hatete, ‘’Hotu ona!’’ Apokalipse 16:17.
Lian ne’e doko lalehan no rai klaran. Rai nakdoko ho maka’as tebes, ‘’rai ne’e nia nakdoko hanesan nunka akontese durante ema ezisti iha mundu. Rai nakdoko nebe perigozu no maka’as tebes.’’ Apokalipse 16:18. Fatuk boot kroat naklekar iha parte hotu-hotu. Tasi sai siak. Anin boot nia huu, rona hanesan demoniu nia lian. Rai nia forma nakfera i nia fundasaun foo dalan ba bee hodi sobu. Ponti kais sira nebe nakonu ho hahalok at ho fitiu hanesan sidade Sodoma, mout iha bee nia siak. Tempu destruisaun ‘’Babilonia boot’’ nian to’o mai tiha ona iha Na’i Maromak oin no foo hanoin Na’i Maromak , ‘’hodi fui kalis uvas husi Na’i Maromak ninia siak nebe nakali ba iha nia leten.‘’ Apokalipse 16:19. Udan boot jeilu hala’o sira nia knaar destruisaun. Sidade arogante sira sei hetan monu. Palasiu nobre sira nebe sai nu’udar fatin ba ema hodi despeja (haloot) sira nia rikeza, rahun iha sira nia oin. Moru kadeia nebe nakfera foo livre ba Na’i Maromak ninia povu hodi hetan Liberdade.
Rate nakloke, nune ‘’ema barak husi sira nebe toba iha rai rahun laran, barak mak …. hetan hader hikas, balun hader ba moris rohan laek, no balun hader hodi simu moe no insulta eternu.’’ Inklui, ‘’sira nebe mak sona Nia,’’ sira nebe mak koalia hatuun Kristu nia sofrementu no mate, no ho laran at kontra Ninia lia loos, sira hotu hadeer hodi haree onra nebe mak foo ba ema sira nebe foo laran no obedese. Daniel 12:2; Apokalipse 1:7.
Rai lakan nebe siak hafalun rai klaran iha ahi laran nebe dalas ba dalas. Iha rai tarutu nia leten, lian misteriu no lian hatauk sira, katak sai kastigu destruisaun ba ema at sira. Ema nebe arogante, kontra no halo at ka laran at hasoru povu nebe kuida ukun fuan Na’i Maromak nian, agora fuan nakdedar tanba tauk. Diabu nakdedar wainhira ema halerik ba misrekordia.
Loron Nebe Na’i Maromak Mai
Profeta Isaias hatete: ‘’Iha tempu neba idolu osan mutin no osan mean nebe ema kria ba sira ida-ida nia an hodi hakneak adora, sei hetan soe hotu ba iha laho no niki sira, no ema sei halai tama ba iha fatuk kuak no subar iha fatuk boot sira leet, tanba tauk Na’i Maromak no Ninia gloria nebe kmaanek wainhira Nia hamriik hodi halo rai klaran sai tauk no nakdedar.’’ Isaias 2:20,21.
Sira nebe uluk sakrifika an tomak ba Kristu agora hetan seguru. Iha ema mundu nia oin no iha wainhira hasoru sira nia mate sira hatudu tiha ona sira nia fidelidade ba Nia nebe mak mate tiha ona ba sira. Sira nia oin, nebe ikus-ikus ne’e muron no kole, agora sai nabilan tanba admirasaun. Sira nia lian hananu iha ai-kananuk vitoria nian: ‘’Na’i Maromak mak ita nia fatin protesaun no poder, tulun nebe mosu hela de’it iha susar laran. Tanba ne’e ita sei la tauk, maske rai klaran ne’e sei mohu, no maske foho sira sei namlele no mout iha tasi klaran; maske tasi siak ho laloran nafurin, maske foho-foho sei nakdoko ho tasi nia ondas.’’ Salmo 46:1-3.
Enkuantu lia fuan konfiansa sira ne’e hasa’e ba Na’i Maromak, Gloria husi sidade selestial naksuli sai husi portaun nebe nakloke. Tuir mai mosu liman ida iha lalehan nebe kaer hela fatuk belar rua. Fatuk sira ne’e mak ukun fuan santu, nebe uluk anunsia iha foho Sinai, no agora deklaradu nu’udar regra julgamentu. Regra ne’e nia lia fuan mesak simplis no fasil atu ema hotu bele lee. Ita nia memoria sei hetan restora fila fali. Istoria at, mamuuk, falsu, no la real sei halakon iha kada ita nia hanoin.
Imposibel tebes atu deskrebe sentimentu oror no dezesperu husi sira nebe mak sama tiha ona ukun fuan Na’i Maromak nian. Tanba de’it atu asegura prazer mundu nian, sira tau sees tiha prinsipiu divinu no hanorin ema seluk kontra ukun fuan. Agora sira hetan malisan husi ukun fuan nebe uluk sira hakribi baa, maske sira haree no hatene hela katak laiha razaun ba sira atu kontra Nai Maromak nia ukun fuan. Inimigu ba ukun fuan Na’i Maromak nian, sira iha konsepsaun foun kona ba lia loos no obrigasaun. Sira tardi liu atu haree katak loron Sabadu mak selu Na’i Maromak nian nebe moris. Sira mos tardi liu atu haree fila fali fondasi rai henek nebe sira konstrui. Sira halo tiha ona funu hasoru Na’i Maromak. Mestri relijiaun sira lidera tiha ona klamar sira ba iha mate rohan laek, enkuantu rekoinese katak sira mak gia hela klamar sira ba lalehan. Responsabilidade ema nian iha kargu sagrada boot tebes, tanba terivel tebes rezultadu husi sira nia infidelidade!
Liurai Ba Liurai Tomak Mai
Iha tempu ne’eba ema sei rona Na’i Maromak nia lian deklara sai loron no oras Na’i Jesus Ninia mai. Israel Na’i Maromak nia ema hamriik hodi rona. Sira oin sai nabilan ho Na’i Maromak nia Gloria. Kalohan metan ki’ik ida mosu imediatamente iha parte loro sae, kalohan nebe haleu Na’i Maksoin. Iha selensiu solene nia laran, povu Na’i Maromak nian foti matan ida-ne’e mak hateke ba iha neba wainhira paisajen ne’e hetok besik mai, to’o nia (paisajen) sai kalohan mutin ida nebe boot tebes, ninia okos iha gloria ida hanesan ho ahi nebe bele halo mutuk, no iha ninia leten iha arkuiris aliansa. Nia agora la’os ona nu’udar ‘’Ema nebe nakonu ho sofrementu,’’ Na’i Jesus mai iha oin nu’udar konkista nebe maka’as. Anju santu sira, iha klibur lubun boot ida nebe mak ninia kuantidade sura labele, atende Nia, anju sira ne’e iha‘’rihun sanulu dala rihun sanulu, no rihun ba rihun.’’ Kada matan hotu hateke ba Prinsipe moris ne’e. Kroa gloriozu ida lokaliza iha Ninia reen to’os. Nia oin nabilan naroman liu fali loron matan iha rai loron. ‘’No iha Ninia batina (mantu) parte kelen iha hakerek naran, liurai ba liurai tomak no Na’i ba nai hotu Apokalipse 19:16.
Liurai ba liurai tomak tuun mai iha kalohan leten, hafalun ho ahi nebe lakan nafurin. Rai klaran nakdedar iha Nia futar oin: ‘’Ita nia Na’i Maromak sei mai, no Nia an sei la Nano’ok de’it; ahi sei han moos iha Nia futar oin, no sei siak liu tan iha Ninia sorin-sorin. Husi kalohan leten Nia sei bolu ba lalehan no bolu mai rai klaran, katak Nia bele julga ninia povu.’’ Salmo 50:3, 4.
‘’No liurai iha rai klaran sira, inklui ema boot, ema riku, ema atan, no ema livre sira, hasubar sira an iha fatuk kuak laran no fatuk leet iha foho leten sira; sira sei hakilar ba foho no fatuk sira hodi dehan, monu ba mai iha ami nia leten, no hasubar ba ami husi Nia oin, husi Nia ida nebe tuur iha kadunan santu leten, no husi Bibi Oan nia siak; loron boot ba Ninia siak to’o ona; see mak sei bele tahan?’’ Apokalipse 6:15-17. Hahalok nebe gosta insulta para ona, ibun nebe bosok, sai Nano’ãok, i nein rona tan buat ida lian, ekzetu so lian harohan no lelir. Ema at sira harohan atu sira nia isin lolon hakoi iha fatuk okos, duke tenki hasoru Na’i Maksoin nia oin nebe uluk sira insulta. Lian nebe mak bele borus to’o ema mate nia tilun, halo ema mate sira konsiente no hatene an. Dala barak ona Nia lian maus ne’e bolu no kunbida sira ba arependementu. Dala barak ona Ninia lian konvite no xamada ne’e sempre rona iha Belun, maun-alin no Maksoin nia orasaun. Lian ne’e hafanu sira nia hanoin ba avizu ida nebe mak uluk hetan hatan ho odiu, no konvite ida nebe mak hetan hatan ho rejeitasaun.
Sira nebe tarata at Kristu iha Ninia humiliasaun, antes Nia hato’o tiha ona ba sira: ‘’Iha tempu ikus liu imi sei haree Oan Mane sei tuur iha liman loos Poder nian, i mai iha kalohan sira leten.’’ Mateus 26:64. Agora sira haree Nia iha Ninia gloria; maibe sira seidauk haree Nia tuur iha liman loos poder nian. Wainhira Nia mai ema mate nebe mate ona sei hadeer hikas fali. Iha neba sei iha Herodes nebe uluk arogante no koalia at hatuun Ninia reinu nia titulu, iha mos ema balun nebe uluk hatuur koroa nebe tarak iha Ninia ulun no tau iha Nniia liman ai-tonka falsu – no sira nebe uluk hakneak iha Ninia oin ho koalia at, insulta, no tafui kaben ba Nia, Prinsipe Moris. Sira hotu koko an atu halai husi Ninia prezensa. Sira nebe prega pregu ba iha Nia liman no ain, sira sei hetan terror no sentimentu sala wainhira haree paisajen ida ne’e.
Ho sentimentu terrivel oin-oin, Nai lulik ho ukun nain sira hanoin kona fila-fali akontesementu iha Kalvari, oinsa sira hisik sira nia ulun iha ksolok Diabu nian hodi hakilar ‘’Nia salva ema seluk; maibe Nia an rasik Nia labele salva.’’ Mateus 27:42. Maibe Lian nebe mai husi kalohan leten maka’as liu fali sira lian uluk nebe haklalak: “Hedi Nia bai ha crus, hedi Nia ba iha krus” nebe nakfera iha Jeruzalem. Basa Lian ‘’Nia mak Na’i Maromak Oan’’ sei halo sira lelir no laran taridu, no koko atu halai subar husi Liurai ba liurai tomak nia oin.
Iha momentu neba, ema sira nebe uluk rejeita lia loos, sira nia konsiensia hetan toka husi arependementu saugati nebe kebit sira nia klamar. Maibe esforsu hirak ne’e atu kompara tan ho saida iha tempu neba! Iha terror nia let sira rona lian haklalak husi ema santu sira: ‘’Ida ne’e mak ita nia Maromak loloos; Ita hein tiha ona Nia, no Nia sei salva ita.’’ Isaias 25:9.
Na’i Maromak Nia Povu Moris Hias
Na’i Maromak nia Oan Mane ninia lian hafanu ema santu sira nebe toba, hadeer sai husi sira nia toba fatin . Ema hotu nebe mate iha rai klaran sei rona Ninia lian ne’e, no sira nebe rona sei moris. Husi uma kadeia mate nian sira mai ho hatais gloria imortal no tanis: ‘’Ohh mate, o nia poder iha nebe? Ohh rate, nia vitoria iha nebe? 1 Korintu 15:55.
Ema hotu sai husi sira rate ho estatura isin lolon hanesan ho uluk sira tama ba rate laran. Maibe sira hotu mosu mai ho isin lolon nebe mak fresku no forsa ho otas klosan imortal. Kristu mai atu restora buat nebe mak lakon tiha ona. Nia sei halo ita an nebe at nakfilak sai hanesan ho Ninia forma nebe nobre. Forma nebe mortal, forma nebe uluk hafoer husi sala, nakfilak sai perfeitu, furak no imortal. Isin restu nebe foer no alejadu husik hela iha rate laran. Ema sira nebe hetan salva sei ‘’krese’’ (Malequias 4:2) sai rasa nebe mak perfeitu iha ninia gloria primitivu, ain fatin ikus malisan pekadu nian apagadu. Ema nebe foo laran, Kristu sei refleta ilas perfeitu sira nia Na’i Maromak nian iha sira nia hanoin, klamar, no isin lolon.
Ema loos sira hetan muda ‘’iha momentu ida nebe lais liu hanesan matan piska.’’ Liu husi Na’i Maromak nia lian, sira nakfilak sai kriasaun imortal hamutuk ho ema santu sira nebe hadeer. Na’i Maromak nia poder hiit sira sae hodi ba hasoru Na’i Maromak iha anin leten. Anju sira ‘’halibur ninia ema eskoilidu sira husi anin parte hat, husi lalehan nia rohan ida ba rohan sira seluk.’’ Mateus 24:31. Inan sira kous hikas sira oan ho sira liman rasik. Maluk sira nebe mate haketak kleur ona halibur malu fila fali, no nunka sei haketak malu tan. Sira hotu sae hamutuk ba iha sidade Na’i Maromak nian ho hananu haksolok.
Tama Iha Sidade Santu
Ema barak nebe sura labele no hetan ona salvasaun, sira nia matan hateke ba iha Jesus no Ninia gloria nebe hatudu, ‘’Nia ilas nebe at liu ema see see de’it, no Ninia forma la hanesan ona ho ema oan.’’ Isaias 52:14. Iha vensedor sira ulun, Na’i Jesus hatuur koroa gloria nian. kada koroa mosu rasik ‘’naran foun’’ (Apokalipse 2:17) no iha hakerek, ‘’Santidade ba Na’i Maromak.’’ iha kada liman monta hoo liman vensedor nian ho arpa nebe nabilan. No tuir mai, wainhira anju nebe komanda foo orden hodi toka lian ai-kananuk, kada liman hotu kebit arpa talin ho toka nebe badaen iha melodia nebe riku no furak. Kada lian sei mosu iha hahi no agrdesementu. ‘’Ba Nia nebe hadomi ita, nebe kasu ona ita husi ita nia pekadu sira ho Nia ran rasik, no halo ona ita sai liurai no amu-lulik ba Maromak ho Ninia Aman, ba Nia de’it mak marese simu gloria no poder ba nafatin.’’ Apokalipse 1:5, 6.
Iha ema lubun boot oin iha Sidade Santu. Na’i Jesus rasik mak loke odamatan boot ba sira, nune ema hotu husi nasaun sira nebe guarda lia loos, bele tama. No tuir mai rona Nia lian hatete, ‘’Mai ba, imi nebe hetan bensaun husi Ha’u nia Aman, sai eransa ba, ba reinu nebe prepara nanis ona ba imi hahuu husi mundu ne’e kria. Mateus 25:34. Kristu aprezenta ba Aman Maromak buat nebe mak Nia ran sosa ona , ho deklara: ‘’Haree ba, Ha’u mak ne’e, hamutuk ho oan sira nebe Aman foo ona mai Ha’u.’’ ‘’Sira nebe Aman foo mai Ha’u, Ha’u kuidadu ho di’ak.’’ Ebreu 2: 13; João 17:12. Oh, iha momentu sira an hetan hiit ba leten, no wainhira Aman infinitu hateke ba sira (nebe hetan ona salva), Nia haree Ninia ilas rasik. Foer no pekadu hamoos tiha ona, no ema sai armonia fila fali ho ilas divinu nian!
Hotu-hotu sei haree hetan Maksoin nia ksolok iha reinu gloria nia laran, no iha klamar sira hotu nebe mak hetan salva ona husi Ninia sofrimentu no humiliasaun. Ema sira nebe hetan salva sei foti parte iha Ninia ksolok; no haree katak sira hetan vitoria liu husi sira nia orasaun, serbisu maka’as, no sira nia sakrifisiu nebe mak nakonu ho domin. Ksolok boot sei hakonu sira laran wainhira sira haree ema ida-idak bele hasoru malun.
Adão Na’in Rua Hasoru Malu
Iha momentu Na’i Maromak simu sira (ema nebe hetan salvasaun) mai iha sidade Na’i Maromak nian, teki-teki rona lian nebe haklalak haksolok. Adão na’in rua atu hasoru malu. Na’i Maromak Oan sei simu Adão (aman ba ita nia rasa) – nebe mak Na’i Maromak kria, no monu ba pekadu, i tanba ninia pekadu sinal krusifikasaun monu ba iha Na’i Maksoin nia ilas. Wainhira Adão haree fitar husi pregu ne’e ho ninia humiliasaun nia soe an ba iha Maksoin nia ain. Maksoin hiit Adão nia an sae no husu nia atu haree dala ida tan ba iha uma Eden nebe mak kleur ona anju sira hafuik nia husi neba.
Adão nia moris nakonu ho tristeza. Kada ai-tahan nebe namlaik, kada vitima sakrifisiu, kada foer nebe hafoer pureza umanu, sai nu’udar lembrador ba ninia pekadu. Ida nebe terrivel liu mak sofrimentu wainhira nia hasoru sensura nebe soe ba nia-ann nu’udar kauza husi pekadu. Maibe nia arepende nia ho fuan-laran, no mate ho esperansa moris hias. Ohin liu husi kasu sala, Adão restoradu hikas fali..
Nia viajen ho haksolok. Nia hare hetan fali ai-huun sira nebe uluk sai nu’udar ninia ksolok, nebe sira nia fuan nia rasik mak libur iha ninia loron sira nebe moos. Nia haree plantasaun sira nebe buras daet nebe uluk nia liman rasik mak hakiak, no ai-funan nebe uluk nia hadomi tebes atu kuida. Ida ne’e mak Eden nebe restora ona!
Maksoin diriji nia ba iha ai-huun moris, no haruka nia han ai-fuan husi ai-huun ne’e ho haksolok. Nia haree ninia familia barak mak hetan salva. No tuir mai nia soe ninia koroa ba iha Na’i Jesus nia ain no hakuak Na’i Maksoin. Nia fekit arpa, no kupula lalehan toka hasoru ho aikananuk triunfu nian: ‘’Marese, marese, Bibi Oan nebe hetan oho ne’e.’’ Apokaliopse 5:12. Adão nia familia sira soe sira nia koroa iha Na’i Maksoin nia oin enkuantu sira hakru’uk hela iha adorasaun. Anju sira tanis ho Adão ninia monu maibe sira sai haksolok wainhira Na’i Jesus loke rate kuak ba ema hotu nebe tenki fiar ba iha Nia naran. Agora sira haree knaar salvasaun konklui ona no sira halibur sira lian hodi hahi Maksoin.
‘’Iha tasi vidru nebe kahur ho ahi,’’ nia leten halibur grupu sira nebe mak ‘’hetan ona triunfu husi animal ne’e, husi animal ne’e ninia estatua, ninia marka no ninia numeru nia naran leten.’’ Sira hamutuk rihun atus ida hat nulu resin hat. Sira mak hetan salvasaun husi entre ema no sira hananu ‘’ai-kananuk foun’’, kananuk Moises no Bibi Oan nian. Apokalipse 15:2,3. Laiha ema ida mak bele estuda ai-kananuk ne’e ekzetu sira rihun atus ida hat nulu resin hat ne’e. Basa aikananuk ne’e mak ai-kananuk kona ba esperensia ida nebe iha grupu seluk nunka iha. ‘’Sira ne’e mak la’o tuir Bibi Oan ba fatin nebe de’it nia ba.’’ Sira ne’e hetan tiha ona interpretasaun husi entre ema sira nebe moris, nu’udar ‘’ai-fuan primeiru ba Na’i Maromak no ba Bibi Oan.’’ Apokalipse 14:4, 5. Sira pasa liu ona tempu susar nebe seidauk akontese dala ida durante nasaun foin hahuu eziste ida iha mundu ne’e; sira simu terus iha tempus usar Jaco nian; sira hamriik hodi pasa liu Na’i Maromak nia julgamentu nebe fakar ba dala ikus sein ho ema intersesor ruma hodi halo orasaun. Sira ‘’fase batina sira nian, no halo sira nia batina sai mutin iha Bibi Oan nia ran.’’ ‘’Iha sira nia ibun la hetan kona lohi no lasu ruma; tanba sira laiha sala ruma’’ iha Na’i Maromak futar oin. ‘’Sira sei la hamlaha tan, sira sei la hamrook tan; loron matan sei la leno sira, no buat manas saida de’it sei la halo sira senti manas. Basa Bibi-Oan nebe mak iha tronu nia klaran ne’e sei foo han sira, no sei diriji sira ba iha bee matan moris nian; no Na’i Maromak sei hamoos hotu matan been husi sira nia matan. ‘’Apokalipse 7:14; 14:5; 7:16, 17.
Sira Nebe Hetan Salva Iha Gloria
iha erra hotu, Salvador nia ema eskoilidu sira la’o iha dalan nebe kloot. Sira hetan purifika iha ahi klaak terus nian. Tanba de’it Na’i Jesus, sira simu odiu, lia bobar, nega an no dezapointamentu nebe moruk. Sira estuda kona ba pekadu ninia at, kona ba pekadu ninia poder, pekadu ninia sala, pekadu ninia dezastre, nune sira konsidera pekadu ho odiu. Sensu sakrifisiu infinitu, sira kura sira nia sakrifisiu ho sira nia hakraik an no hakonu sira laran ho sentimentu agradesementu. Sira sadia tebes ema seluk basa sira hetan perdaun barak ona. Haree Lucas 7:47. Hola parte iha sofrimentu Kristu nian, siknifika sira marese duni atu foti parte iha Ninia gloria.
Erdeiru Na’i Maromak nian mai husi uma kakuluk, karahan, spasu iha rai okos, rai leet nebe dalas, foho, dezertu (rai henek fuik maran), no rai kuak. Sira moris ‘’kiak, terus, no hetan kastigu.’’ Ema tokon ba tokon tama rate laran karegadu ho kondisaun at tanba de’it rejeita atu rende ba Diabu. Maibe ohin sira sei la terus tan ona, no sei la fahe malu ketak-ketak tan ona, no sira sei la hetan tan ona opresaun. Hahuu husi neba sira hamriik ho hatais batina nebe luxu liu, duke batina sira nebe uluk nai ulun sira hatais iha rai klaran. Sira nia ulun hatuur ho koroa nebe mak nobre liu duke koroa baibain nebe uluk hatuur iha liurai sira nia ulun iha mundu. Liurai Nobre hamoos sira nia matan been nebe suli iha sira hasan. Sira hananu ai-kananuk hahii ho momoos, midar, no armonia. Inu lian nakfera mai husi lalehan: ‘’Ita nia salvasaun mai husi ita nia Na’i Maromak nebe tuur iha kadunan leten, no Bibi Oan.’’ Nune’e, sira hotu-hotu hatan, ‘’Amen: Rahun di’ak, no gloria, no sabedoria, no agradesementu, no onra, no kbiit, no poder, sai parte ba ita nia Na’i Maromak nian nafatin ba nafatin.’’ Apokalipse 7:10, 12.
Iha moris ida-ne’e, ita so bele hahuu entende de’it tema furak husi redensaun. Ho ita nia koinesementu nebe limitadu, ita bele tetu ho seriu sentimentu moe no gloria, moris no mate, justisa no misrekordia, nebe mak hasoru malu iha krus; maibe ho ita nia kbiit mental nebe boot tebes, ita faila atu entende redensaun ho kompletu. Domin redensaun nia naruk, nia luan, nia klean no nia aas difisil atu ita entende. Ita so bele entede ho vagamente (la duun klaru) de’it Ita sei la entede didi’ak planu redensaun kompletu, ate wainhira ema sira nebe hetan kasu haree hanesan ho oinsa ema haree sira no hatene hanesan ho oinsa ema koinese sira; maibe liu husi sekulu rohan laek sira lia loos foun sei nakloke sai ba iha hanoin nebe mak sempre koriozu no haksolok. Maske tristeza no sentimentu moras no tentasaun iha rai klaran hotu ona no sira nia kauza apaga lakon ona, povu Na’i Maromak nian sei sempre iha koinesementu nebe diferente no matenek kona ba saida mak sira tenki selu ba sira nia salvasaun.
Krus sei sai nu’udar knanuk ba ema sira nebe hetan redensaun iha periodu rohan laek. Iha Kristu nebe gloriozu sira haree ema hedi Kristu ba iha krus. Nunka sei atu haluhan katak Nia Nebe Gloriozu iha lalehan hakraik Nia an hodi hiit hikas ema nebe monu ba pekadu. Nia karegadu ho sentimentu sala no moe tanba pekadu. Nia hasubar Ninia Aman nia oin to’o sofrimentu husi mundu nebe lakon tiha ona ne’e harahun Nia laran no destroi Nia moris. Na’i Kriador universu tomak tau sees tiha Ninia gloria tanba domin ba ema – ida ne’e sempre estimula maravila husi universu. Wainhira ema husi nasaun sira nebe mak hetan ona salvasaun, hateke ba sira nia Maksoin no hatene katak Ninia reinu sei la hotu, sira hananu ai-kananuk: ‘’Bibi Oan nebe uluk hetan oho ne’e marese duni, no kasu ona ita ba iha Na’i Maromak ho Ninia ran nebe mak folin boot tebes!’’
Misteriu krus nian esplika misteriu sira hotu. Sei revelado katak Nia nebe infinitu iha sabedoria, labele dezenia planu ba ita nia salvasaun ekzetu sakrifikasaun Ninia Oan. Kompensasaun ba sakrifikasaun ida-ne’e mak sai ksolok ba abitante iha rai klaran no kriatura nebe mak hetan kasu, santu, ksolok no imortal. Ida ne’e mak klamar sira nia folin, nebe halo Aman Maromak satisfas ho folin nebe mak Nia tenki selu tiha ona. No Kristu rasik, haree rezultadu nebe foo satisfasaun ba Ninia sakrifisiu.