Iha fim husi tinan 1000, ‘’Kristu fila fali mai iha mundu akompania husi ema sira nebe Nia kasu ona anju lubun boot ida. Nia husu ema at sira nebe mate ona, moris hias hodi simu sira nia ruina (kastigu dezastre). Sira hader mosu mai barak hanesan rai henek iha tasi nebe sura labele. Sira nafatin lori surtu moras no mate nia ain fatin. Kontrariu tebes ho sira nebe mak hadeer tiha ona iha moris hias promeiru!
Kada matan ida-idak dirijidu atu haree Na’i Maromak Oan nia gloria. Ho lian ida, uma na’in ba ema at nian hakilar: ‘Haksolok ba Nia nebe mai ho Maromak nia naran!” Mateus 23:39. La’os domin mak inspira lia fuan hirak nebe sira temi ne’e. Maibe poder lia loos nian mak obriga lia fuan sira ne’e temi sai husi sira ninia ibun nebe lakohi atu temi. Hanesan ema at sira tama ba iha rate laran, nune’e sira sei mai ho hostilidade (natureza inimigu) no espiritu rebeliaun nian hanesan uluk, hodi hasoru Kristu. Sira sei laiha tan ona periodu teste (ezame repete) foun hodi foo biban ba sira atu hadia sira nia moris pasadu.
Profeta hatete: ‘’Iha loron neba, Nia ain sei hamriik iha foho Oliviera, …. no foho Oliviera nia klaran sei nakfera.’’ Zacarias 14:4. Iha momentu sidade Jerusalem foun tuun mai husi lalehan, sidade ne’e sei hatuur iha fatin nebe mak preparadu ona, no Kristu, hamutuk ho Ninia povu no anju sira, la’o tama ba iha sidade sagradu laran.
Wainhira nia knaar lohi nian kotu hela, prinsipe krimi ne’e sofre no triste tebes. Maibe wainhira ema at sira nebe mate ona hadeer hikas fali, no nia haree katak ema barak mak iha nia sorin-sorin, nune ninia esperansa hadeer fila fali. Nia desidi atu labele hamosu kontroversia boot. Nia sei aranja ema sira nebe lakon salvasaun iha ninia bandeira okos. Ho rejeita Kristu, sira aseita lider rebeldes ne’e nia governansia, no pronto atu ezekuta ninia orden. Maibe akordu ho ninia lasu inisiu, nia la rekoinese nia an hanesan Diabu. Nia afirma katak nia mak na’in legal ba mundu nebe ninia eransa hetan hadau ho injustamente husi nia. Nia reprezenta rasik an nu’udar maksoin, konvense nia povu nebe mak monu ba nia lasu katak ninia poder mak fanu sira husi rate laran. Diabu halo ema nebe fraku sai forsa, no inspira sira hotu ho ninia enerjia rasik hodi lidera sira okupa sidade Na’i Maromak nian. Nia aponta ba ema tokon ba tokon nebe sura labele, nebe mak hadeer tiha ona husi mate, ho deklara katak, nu’udar sira nia lider nia iha abilidade hodi hetan fila fali ninia tronu no ninia reinu.
Iha ema lubun boot ne’e nia laran, iha ema rasa tinan naruk; nebe ezisti antes Bee Sae iha tempu Noe nian. Sira ain aas no isin boot. Sira iha matenek nebe luan; sira kria obra nebe mesak ekstraordinariu, nune halo mundu idolatra (hadomi) sira nia jeniu (matenek). Maibe sira nia krueldade ho sira nia deskoberta nebe at halo Na’i Maromak apaga sira husi Ninia kriasaun. Alein ema rasa tinan naruk, iha mos liurai no komandante tropa sira, nebe mak uluk nunka lakon iha funu laran. Durante sira nia mate sira laiha mudansa ruma. Wainhira sira hadeer husi rate, sira nafatin hetan kontrola husi dezeju nebe hanesan hodi konkista buat nebe mak ukun sira wainhira sira monu. (Ida ne’e mak milimium, nebe mak esplika iha Biblia laran iha Apokalipse 20:1-6 no iha ninia livru kompletu, Kontroversia Boot pajina 41.)
Atake final hasoru Na’i Maromak
Diabu halo konsultasaun ho ema poderozu sira ne’e. No sira deklara katak tropa ezersitu nebe iha sidade foun ki’ik liu, se kompara ho sira nian. Sira fiar metin sira sei halakon sidade ne’e. Badaen sira nebe espisializadu hahuu halo ekipamentu funu nian. komandante militar sira hahuu organiza funu na’in sira ba iha kompania no devizoens.
Ikus mai instrusaun ba asalta anunsiadu. Ezersitu lubun boot nebe sura labele, kontinua book an ho forma hanesan poder nebe kombinadu, no kompostu husi otas hotu. Diabu lidera ninia ezersitu, liurai no asuwain sira iha ninia kuda kareta. Ho dekretu militar, lina ezersitu abansa husi rai klaran nebe rahun nia leten, hodi ataka sidade Na’i Maromak nian. Maibe Na’i Jesus komanda, tiha ona taka odamatan boot sidede Jeruzalem, wainhira ezersitu Diabu nian preparadu atu invade.
No agora mak tempu ona Kristu atu hamosu Nia an ba iha Ninia inimigu sira. dook husi sidade nia leten, iha baze osan mean nabilan nia leten, iha tronu ida. Iha tronu ne’e nia leten Na’i Maromak Oan tuur, no povu husi Nia reinu haleu Nia sorin-sorin. Gloria Aman Rohan laek nian hafalun Ninia Oan Mane. Ninia prezensa nebe naroman naksuli sai liu husi odamatan boot, inunda mundu ho naroman.
Sira nebe besik liu ho tronu ne’e, mak sira nebe uluk entuzias iha knaar Diabu nian, maibe hetan fokit nu’udar sinal husi keimadndu (ahi han), nebe mak la’o tuir tiha ona sira nia Salvador ho devosaun nebe forsa. Tuir mai mak foin sira nebe halo perfeitu karakter mesmu iha falsidade no deslealdade nia leet, nebe mak tane aas tebes ukun fuan Na’i Maromak nian iha wainhira mundu deklara kanselamentu ba ukun fuan Na’i Maromak nian, no ema tokon, husi era hotu, nebe mak sai ona martir tanba sira nia fee. Iha sidade Jeruzalem liur iha ‘’ema lubun boot, nebe mak laiha ema ida mak bele sura. Sira mai husi nasaun, suku, povu no lian hotu-hotu …. Sira uza batina mutin, no ai sanak tahan Palmeira iha sira nia liman laran.’’ Apokalipse 7:9. Sira nia funu hotu ona, sira manan ona sira nia vitoria. Ai sanak tahan mak sai nu’udar simbolu triunfu ida , batina mutin sai nu’udar emblema lia loos Kristu nian, nebe mak ohin agora sai parte ba sira nian.
Iha ema barak sira ne’e laiha ema ida mak fiar salvasaun mai husi sira an liu husi sira nia bondade. Laiha tan ida mak sei konta sira ninia sofrimentu; tonika husi kada inu mak, Salvasaun ba ita nia Na’i Maromak no ba Bibi Oan.
Sentensa Pronunsiadu Ba Rebeldes Sira
Iha prezensa abitante rai klaran no lalehan nebe halibur, koroasaun Na’i Maromak nia Oan Mane akontese. No agora, ho majestade no poder aas liu, Liurai ba liurai hotu hamonu sentensa ba rebelde sira nebe mak kontra ona Ninia ukun fuan no dadur Ninia povu. ‘’Ha’u haree tronu mutin nebe boot, no Nia nebe tuur iha tronu ne’e nia leten, nebe mak husi Ninia oin, rai klaran ho lalehan lakon mohu; no laiha tan ona fatin ba sira. No ha’u haree ema mate, ki’ik ho boot, hamriik iha Na’i Maromak oin; no livru sira ne’e nakloke, no nakloke mos livru sira seluk, mak livru moris nian, no ema mate sira hetan sentensa bazeia saida mak hakerek ona iha livru sira ne’e nia laran, tuir sira ninia hahalok.’’ Apokalipse 20:11, 12.
Wainhira Na’i Jesus nia matan hateke ba ema at sira, sira konsiensia ba kada pekadu nebe uluk sira halo. Sira haree oinsa sira ain la’o sees husi dalan santidade. Tentasaun nebe tenta sira, sira hatan ho intrega an ba pekadu. Na’i Maromak nia mensajeiru sira nebe hetan insulta, no avizu sira nebe hetan rejeita, no laloran grasa nebe mak hetan duni-fila husi laran no ulun nebe to’os i lakohi atu arepende – buat sira ne’e hotu mosu, hanesan fali hakerek tiha ona iha kaligrafia ahi nian.
Iha tronu leten mak revela kona ba krus. Hanesan paisajen panorama nebe mak aprezenta sena (hahalok) kona ba Adão ninia monu no etapa-etapa nebe akontese tuir-tuir iha planu redensaun nia laran. Hahuu husi Na’i Salvador nia moris iha mundu; Ninia moris nebe simplis; Nia hetan batismu iha mota Jordão; Ninia jejun no tentasaun nebe Nia hasoru iha rai henek fuik maran; Ninia ministeiru nebe revela bensaun lalehan nian ba ema; iha nia moris loron-loron nian Nia halo asaun karidade, kalan-kalan Nia halo orasaun iha foho leten; Planu odiu no inveza nebe responde hasoru ba Ninia bondade; sofrimentu misteiru iha jardin Getsmania nebe iha okos iha naha pekadu mundu nian; Nia hetan trai husi oho-dor lubun ida; akontesementu iha kalan nebe terivel – Nia sai nu’udar Prizoneiru nebe mak nunka kontra no nebe abandonadu husi Ninia eskolante sira; oinsa Nia hetan julga iha palasiu boot amlulik nian, iha salaun tribunal Pilatus nian, iha ema tauk ten no Herodes sira oin; Nia hetan EJEK, insulta, tortura, no kondenadu ba mate – buat sira ne’e hotu pinta ho klaru iha sena refere nia laran.
No agora sena ikus nian nakloke iha ema barak nebe nakdoko nia oin: Terus na’in nebe pasensi la’o iha dalan ba Kalvari; Liurai Lalehan nia oan mane hetan tara iha krus; Amu lulik no rabinu (mestri) sira koalia at Ninia sofrimentu nebe sei remata; nakukun sobrenatural nian nebe hafalun rai nu’udar marka, wainhira Maksoin ba mundu intrega Ninia an ba mate.
Paisajen terivel sira ne’e mosu ho nune’e de’it. Diabu ho ninia povu laiha poder atu sees husi pintura ne’e. Kada autor lembra fila fali parte nebe mak sira halo ona. Herodes, nia mak oho labarik ki’ik inosente sira iha Belem; baze Herodias nian, nebe ninia klamar mak Joao Batista sadere ba; Pilatus nebe fraku no servi tempu; soldadu nebe koalia at; ema bulak lubun ida nebe hakilar, ‘’Ninia ran husik ba monu mai iha ami, no ami nia oan sira nia leten!’’ – nune’e sira hotu haka’as an ho saugati hodi subar an husi majestada divinu, no husi Ninia oin. Enkuantu sira nebe hetan kasu ona soe sira nia kroa iha Na’i Salvador nia ain, ho haklalak, ‘’Nia mate ba Ha’u!’’
Iha mos Nero, jigante krueldade no krime nian, nebe mak hetan prazer Diabu nian liu husi ema sofredor sira nia majestade. Ninia inan tanat haree ninia oan nia obra, nebe nia oan rasik mak hala’o, no oinsa korajen nebe hetan apoiu husi ninia influensia no ezemplu foo ona rezultadu iha krime nebe mak kauza mundu sai terrivel.
Iha saserdote no amu lulik papista nebe mak afirma an nu’udar ambassador Kristu nian, nebe uza raga. Kadeia rai okos, no tore hodi kontrola Na’i Maromak nia povu. Iha Papa nebe arogante nebe foti an iha Na’i Maromak nia leten no konsederadu troka ukun fuan Nebe mak Ass Liu. Aman sira nebe halo finji ne’e iha responsabilidade atu hatan ba Na’i Maromak. Sira tarde tiha ona atu haree katak Ida Nebe Oneisiente (hatene buat hotu) laran moras ba Ninia ukun fuan. Agora sira estuda katak Kristu identifika Ninia interese ho Ninia povu nebe terus.
Ema at hotu iha mundu hetan julgadu ho akuzasaun traisaun klase aas hasoru governansia lalehan nian. Laiha ona ema ida mak hamriik husi Sira hodi defende sira nia objetivu; sira laiha razaun; ho nune’e mak pena mate rohan laek monu ba sira an.
Ema at haree buat nebe mak sira halakon tiha ona ho sira nia rebeliaun. ‘’Buat sira ne’e hotu,’’ klamar nebe lakon hakilar, ‘’parese ha’u uluk infrenta tiha ona. Oh hahalok bulak nian nebe estreinu (fuik)! Ha’u troka tiha ona moris dame, haksolok, no onra ho sofrimentu, moris at, no dezapontamentu.’’ Ema hotu haree katak ignorasaun nebe sira hetan husi lalehan ne’e justu. Liu husi sira nia moris, sira deklara tiha ona: ‘’Ita sei la hetan ema ida-ne’e (Jesus) atu ukun ita,
Diabu Lakon Iha Funu
Ema at haree ordenasaun Na’i Maromak nia Oan Mane nian ho sira nia fitiu nebe hanesan ho orguliu. Sira haree iha Nia liman iha fatuk belar ukun fuan divinu nian, nebe mak uluk sira insulta. Sira haree adorasaun rebenta husi ema sira nebe hetan ona salvasaun; no wainhira laloran melodia dasa ema barak iha sidade liur, hotu-hotu haklalak, ‘’O nia dalan, justu no loos, ohh Liurai ba ema santu sira.’’ no ema hotu monu no hakneak, hanai Prinsipe moris nian, Apokalipse 15:3.
Diabu, haree hanesan paralizadu. Hafoin kobridor kerubin loke, nia lembra kona nia monu tuun mai husi nebe. Husi konseilu nebe uluk nia hetan onra ba, no eskluidu ba nafatin. Nia hare ida seluk agora hamriik besik iha Aman Maromak, nia mak anju ida ho prezensa nebe nobre. Diabu hatene katak pozisaun nobre anju ne’e kaer parese ninian.
Ninia memoria foo hanoin hikas fali nia kona ba ninia inosensia, moris dame, no satisfasaun ksolok nebe sai parte ninian, to’o nia hetan ninia rebeliaun. Nia observa ninia serbisu iha ema no ninia rezultadu husi inimizade entre ema ho ema, destruisaun moris nebe terivel, oinsa nia hetan duir tuun husi tronu, tumultu (baruliu), konflitu, no revolusaun. Nia lembra hetan ninia esforsu nebe sadik hela de’it Kristu ninia serbisu. Wainhira nia haree ba rezultadu husi ninia esforsu hirak ne’e, nia so haree hetan de’it failansu nu’udar rezultadu. Iha progresu kontroversia boot ne’e, nia hetan lakon no hetan obriga hodi rende.
Objetivu husi rebelde boot mak, atu prova katak governu divinu mak resposabilidade ba rebeliaun refere. Nia lidera ema barak hodi simu ninia versaun. Durante tinan rihun ba rihun ulun boot konspirasaun nian ne’e troka tiha ona lia loos ho falsidade. Maibe ninia tempu agora to’o tiha ona wainhira istoria no karakter Diabu nian tenki reveladu (nakloke sai). Iha Diabu ninia esforsu ikus atu hamonu Kristu, mak destroi Kristu nia ema, no foti kontrola sidade Na’i Maromak nian. Nune’e mak lohi-dor boot ne’e ninia lohi hetan deskobre sai ho kompletu. Sira nebe unido hamutuk ho nia haree failansu totalmente iha Diabu nia luta.
Diabu haree katak ninia rebeliaun nebe ho voluntariamente ne’e, la foo posibilidade ba nia atu tama lalehan. Nune’e nia treinu ninia forsa hodi funu hasoru Na’i Maromak; pureza no armonia lalehan nian ba nia hanesan tormentu (kastigu) nebe aas liu. Nia nafatin hakru’uk no rekoinese lei justisa ninian.
Kada pergunta kona ba lia loos no erru iha kontroversia nebe mak la’o kleur ona, agora reveladu klaramente. Rezultadu sira nebe mak tau sees lei divinu, nakloke tiha ona iha unversiu tomak nia matan. Istoria pekadu sei hamriik ba nafatin sai sasin katak ho ukun fuan Na’i Maromak nian nebe eziste, kesi metin ksolok ba kriatura hotu nebe Nia kria ona. Universu hotu, foo laran no rebela, ho agrimentu ida, hatete, ‘’O nia dalan justu no loos, ohh Liurai ba ema santu sira.’’
Ninia oras to’o ona wainhira Kristu hetan gloria iha naran hotu-hotu nia leten, nebe mak temi. Tanba ksolok boot nebe mak desponivel iha Nia futar oin – katak Nia bele lori oan barak bai ha gloria nia laran – Nia mak responsabeliza krus. Nia haree ema sira nebe Nia kasu, hetan renovasaun tuir Nia ilas rasik. No Nia haree iha sira nia ilas laran, rezultadu husi Ninia klamar nia sofrimentu, no Nia satisfas. Isaias 53:11. Ho lian nebe alkansa to’o ema barak, ema loos, no ema at, Nia deklara: ‘’Haree ba buat nebe mak Ha’u ran sosa! Tanba sira ne’e mak, Ha’u terus, tanba sira ne’e mak Ha’u mate.’’
Violensia Ikus Husi Ema At
Diabu nia karakter nafatin aiha mudansa.rebeliaun hanesan SEMBURAN perigozu ida nebe mak rebenta fila fali. Nia hakotu desizaun atu labele rende ba iha luta ikus hasoru Liurai lalehan nian. Maibe husi ema tokon ba tokon nebe sura labele, nebe mak Diabu konsola ona hodi halo rebeliaun, agora laiha ida mak bele rekoinese ninia supremasia. Ema at hetan odiu nakoni nebe hanesan ba Na’i Maromak nebe mak inspira Diabu, maibe sira haree katak kazu sira nian laiha ona esperansa.
Ahi tuun husi Na’i Maromak nebe mai husi lalehan. Rai klaran nakfera. Ahi nebe han hela, rebenta husi kada rai naruuk nebe mak nakloke luan. Fatuk sira ne’e ahi han loos. element ki’ik sira nabeen ho manas nebe nafurin, rai klaran mos no obra sira nebe iha laran ahi han mohu. 2 Pedro 3:10. Rai klaran nia oin haree hanesan masa ida nebe nabeen – lagoa (bee lihun) ahi nebe luan rabenta nafurin. Ida ne’e mak ‘’loron vingansa Na’i Maromak nian, no tinan rekompensa ba kontroversia nebe uluk akontese iha Siaun.’’ Isaias 34:8.
Ema at hetan kastigu ‘’tuir sira nia hahalok.’’ Diabu hetan sofrimentu la’os tanba de’it ninia rebeliaun rasik, maibe mos tanba pekadu hotu nebe mak rezulta Na’i Maromak ninia povu komete mos pekadu. Ikus mai, Ema at sira hetan duni destruisaun ahi laran nebe lakan, tantu ema at nia abut no nia sanak – basa Diabu mak sira nia abut no Diabu nia maktuir sira mak sanak. Kastigu kompletu husi kastigu to’o tiha ona; reklamasaun justisa nian kumpri ona. Knaar destruisaun Diabu nian konklui ona ba nafatin. Kriatura Na’i Maromak nian libertadu ona husi tentasaun hahuu husi agora ba nafatin.
Enkuantu rai klaran falun metin ho ahi, no ema loos sira hela ho seguru iha Sidade Santu. Enkuantu Na’i Maromak nia prezensa ba ema at sira mak ahi nebe lakan no han mutuk, no ba povu ninian Nia sai nu’udar salvaguarda (sasatan) ida hodi satan sira.
Ita Nia Uma Ikus
’’Ha’u haree lalehan foun no rai klaran foun; basa lalehani ida primeiru no rai klaran ida ‘primeiru laiha ona.’’ Apokalipse 21:1. Ahi nebe han mutuk ema at hamoos tiha ona rai klaran. Kada malisan nia rais, dasa lakon mohu hotu ona. Laiha tan ona Ahi inferno mak atu lakan eternamente hodi tahan konsikuensia-konsikuensia pekadu nebe terivel iha ema sira nebe hetan kasu ninia oin.
Iha lembrete ida de’it mak husik hela: ita nia Maksoin sei sempre lori Ninia marka krusifikasaun, knaar uniku nebe kruel, nebe mak rezulta husi pekadu. Durante sukulu ba sekulu kanek iha foho Kalvari sei hatudu Ninia hahii no deklara Ninia poder.
Kristu foo garantia ba Ninia disiplu sira katak, Nia ba atu prepara fatin (karahan/uma ki’ik) ba sira ida-idak iha Aman Maromak nia uma. Ema nia lian labele atu pinta ema loos sira kolen. Ida ne’e so bele hatene de’it husi sira nebe mak haree Nia. Laiha hanoin finite ida mak bele komprende gloria husi Paradisu Na’i Maromak nian!
Iha Biblia, eransa ba ema nebe hetan ona salvasaun, temi nu’udar ‘’nasaun ida,’’ Ebreu 11:1416. Iha neba mak Bibi Atan selestial lidera Ninia bibi lubun ba iha bee matan moris nian. Iha neba iha mos mota nebe suli la para, no moos hanesan kristal, no iha mota ninin iha ai-huun sira nebe nia tahan no sanak book an no foo lalatak hodi hamahon dalan nebe preparadu ona ba ema sira nebe Na’i Maromak Kasu ona. Rai tetuk nebe luan nakfilak sai foho inur sira nebe furak, i Na’i Maromak nia foho sira lokaliza iha foho leten nebe aas liu. Iha rai tetuk dame neba, alein bee mota-moris sira ne’e, povu Na’i Maromak nian, peregrinu sira nebe kleur ona la’o lemorai, sei hetan uma ida.
‘’Sira sei harii uma, hodi hela; no sira sei halo to’os, kuda uvas hodi han ninia fuan. Sira sei la harii atu sira seluk hela; sira sei la kuda atu sira seluk han; …. Ha’u nia ema eskoilidu sira sei aproveita goja serbisu nebe sira halo ho liman rasik iha tempu nebe kleur.’’ ‘’ Rai fuik maran no fatin fuik sira sei haksolok tanba sira, nune’e rai henek sei haksolok no buras hanesan ai-funan roza.‘’ ‘’Asu fuik mos sei hela hamutuk ho bibi, no leoparda sei latan an hamutuk ho bibi sorin; …. no labarik ki’ik ida sei diriji sira …. Sira sei la halo moras ka harahun ba malun iha Ha’u nia foho santu,’’ Isaias 65:21, 22; 35:1; 11:6-9.
Moras la eziste tan ona iha lalehan. Sei laiha tan ona matan been. Sei laiha tan ona kareta funeraria. ‘’Mate sei laiha tan ona, laiha tan ona tristeza, ka lelir ruma: …. Basa buat sira nebe uluk nian lakon tiha ona.’’ ‘’sei laiha ema ida hela iha neba mak sei hatete, ha’u moras: no ninia ema hotu sei hetan perdaun ba sira nia pekadu.’’ Apokalipse 21:4; Isaias 33:24.
Iha Jeruzalem foun, sidade metropolitana rai klaran foun nian, nebe mak hetan gloria, sei sai ‘’Naroman hanesan ho fatuk nebe folin liu, atee to’o hanesan ho fatuk jaspe no moos hanesan kristal.’’ ‘’ Sira nebe hetan salvasaun, sira nia nasaun sei la’o iha sidade nia naroman laran; no liurai sira iha rai klaran lori sira nia gloria no onra ba iha sidade ne’e laran.’’ ‘’Tebernaklu Na’i Maromak nian hela hamutuk ho ema, no Nia sei hela ho sira, no sira sei sai nu’udar povu Ninian, no Na’i Maromak rasik mak sei akompania sira, no sai nu’udar sira nia Maromak’’ Apokalipse 21:11, 24, 3.
Iha sidade Na’i Maromak nian ‘’kalan sei laiha.’’ Apokalipse 22:5. Laiha tan kole. Fresku Dader nian ita sei senti, dook husi ninia besik. Naroman loron matan nian sei hetan troka husi naroman ida nebe sei la halo moras no matan no oin halai, basa naroman ne’e ninia roman naroman liu fali ita nia naroman iha loron manas. Ema nebe mak hetan kasu, la’o iha gloria loron rohan laek nia laran.
‘’Ha’u haree, laiha templu iha sidade nia laran: tanba Na’i Maromak poderozu no Bibi Oan mak templu ne’e rasik.’’ Apokalipse 21:22. Povu Na’i Maromak nian iha direitu espesial hodi estabelese asembleia nebe nakloke ho Aman Maromak ho nia Oan Mane Jesus Kristu. Agora ita haree ona Na’i Maromak ninia ilas hanesan iha lalenok laran, maibe tuir mai ita sei haree Nia, oin ho oin, sein buat ida mak atu helik tan entre ita ho Nia.
Triunfu Ba Domin Na’i Maromak Nian
Iha neba domin ho simpatia nebe Na’i Maromak rasik kuda ona iha ema nia klamar, sei hetan treinu nebe loos no midar tebes. Komuniaun puru ho kriatura santu sira no otas sira hotu nebe fiar, no tali relasaun nebe kesi hamutuk ‘’familia tomak iha lalehan no rai klaran’’ – tulun tebes hodi forma ksolok ba ema sira nebe hetan kasu. Efesu 3:15.
Iha neba, hanoin imortal sei kontempla ho poder kreativu nebe maraveloza ho naroman nebe nunka faila, no misteriu husi domin nebe mak kasu. Kada abilidade sei dezenvolvido, kada kapasidade hetan kresementu. akizizaun kuinesementu sei la supa enerjia. Esforsu boot liu boot bele aprezentadu iha oin, aspirasaun aas alkansadu, ambisaun aas realizadu. No iha neba sei iha tan buat foun aas seluk mak sei hetan resolve, iha maravila (buat furak) foun atu admira, iha lia loos foun atu komprende, iha objetu fresku atu estimula kbiit husi hanoin, klamar no isin lolon.
Riku soi hotu iha universu tomak sei nakloke ba ema sira nebe Na’i Maromak kasu. Ho livre husi mortalidade, sira semo sein kole ba iha mundu sira nebe dook. Rai klaran nia oan sira sei tama ba iha kriatura sira nebe la monu nia mundu ho ksolok no sabedoria hodi fahe riku soi kuinesementu nebe mak obtidu (hetan) ona durante sekulu ba sekulu. Ho vizaun nebe klaru sira hateke ba gloria kriasaun – loron matan no fitun no sistema sira hotu nebe aranja ho orden no haleu tronu divindade.
No iha tinan-tinan rohan laek sira nebe mak nakduir, sei lori no hato’o revelasaun Na’i Maromak nian nebe nobre liu tan kona ba Kristu. Hetok ema barak estuda kona ba Na’i Maromak, hetok boot tan sira nia admirasaun ba Ninia karakter. Wainhira Jesus loke rikeza redensaun no konkista maravila sira iha sira nia oin husi kontroversia boot ho Diabu, sira nebe hetan kasu, sira nia laran esklama ho devosaun, no lian rihun sanulu dala rihun sanulu unidu hodi hasa’e poder koru louvor nian.
‘’No kada kriatura sira hotu iha lalehan, no iha rai , no iha rai okos, no iha tasi laran, no buat hotu nebe iha laran, rona no hatete, Rahun di’ak, no onra, no gloria, no poder, ba Nia nebe tuur iha tronu leten, no ba Bibi Oan, husi nafatin ba nafatin.’’ Apokalipse 5:13.
Kontroversia boot akaba ona. Pekadu no pekador sira laiha ona. Universiu tomak moos ona. armonia no alegria nia fekit, tarutu liu husi kriasaun nebe luan. Moris, no naroman, no alegria, naksulin hakuur ho ilimitada iha spasu universiu, husi Nia nebe kria buat hotu- hotu. Husi atomu nebe ki’ik-oan liu to’o mundu nebe boot liu, buat hotu, nebe iha iis no laiha iis, iha sira nia furak no sira nia ksolok perfeitu sein lalatak, deklara katak Na’i Maromak mak domin.